Самарқандда юк машинаси ва Isuzu автобуси иштирокида йўл-транспорт ҳодисаси содир бўлди. Бу ҳақда Самарқанд вилояти ИИБ ЖХХ ЙҲХБ ахборот хизмати хабар берди.
Маълум қилинишича, 16 январь куни соат 13:20 лар атрофида Ургут тумани ҳудудидан ўтувчи 4Р-47 Булунғур—Ургут автомобиль йўлининг “Мерганча” маҳалласи ҳудудидан ўтувчи 64-километрида Isuzu автобуси билан Changan русумли юк машинаси ўртасида тўқнашув содир бўлган. Натижада Isuzu русумли автобус йўлнинг ўнг томонидаги ариққа ағдарилган.
Ҳодиса оқибатида автобус салонида бўлган ҳайдовчининг ёрдамчиси тан жароҳати олиб туман тиббиёт бирлашмасига мурожаат қилган ва енгил тан жароҳати олгани учун уйига жавоб бериб юборилган. Айни пайтда Ургут тумани ИИБ ЖХХ ЙҲХБ томонидан дастлабки суриштирув ишлари олиб борилмоқда.
Эслатиб ўтамиз, июнь ойида Тошкент шаҳар Учтепа туманида йўловчи электробуси ва Lacetti иштирокида ЙТҲ содир бўлганди. Сентябрда эса Тошкентда йўловчилар бўлган электробус бетон устунга бориб урилган эди.
Изоҳ (0)