Farg‘ona viloyati IIB Farg‘ona shahridagi ko‘ngilochar maskanlarning birida ichki ishlar xodimi va fuqaro o‘rtasida yuz bergan janjal yuzasidan ma’lumot berdi.
Qayd etilishicha, 2023-yil 17-dekabr kuni fuqarolarning IIOga shikoyati asosida Farg‘ona shahar IIO FMB 3-son IIB profilaktika inspektori kapitan T.Hoshimov tungi soat 23:50 da shahardagi “Mashʼal” MFYdagi ko‘p qavatli uyning yerto‘lasida joylashgan Rich ko‘ngilochar maskaniga (karaoke-bar) kelgan. Xodim tungi vaqtda fuqarolarning tinchini buzib, baland ovozda qo‘shiq kuylayotgan va kompyuter o‘ynayotgan mijozlarni tarqatmoqchi bo‘lganida, ushbu maskan rahbari 29 yoshli A.X. IIO xodimlarining qonuniy talablariga bo‘ysunmay, jamiyatda yurish-turish qoidalarini qasddan mensimasdan, faol qarshilik ko‘rsatgan.
Vazirlar Mahkamasining 2021-yil 15-oktyabrdagi 648-son qarori 11-bandida ko‘p kvartirali uyning yerto‘lasida joylashgan korxonalar, restoranlar, kafelar, barlar hamda ko‘ngilochar maskanlarning soat 23:00 dan keyingi faoliyatiga yo‘l qo‘yilmasligi ko‘rsatib o‘tilgan.
Mazkur holat yuzasidan fuqaro A.X.ga nisbatan Ma’muriy javobgarlik to‘g‘risidagi kodeksning 183 (mayda bezorilik) va 194-moddalari (Ichki ishlar organlari xodimining qonuniy talablarini bajarmaslik) bilan hujjatlar rasmiylashtirilib, qonuniy qaror qabul qilish uchun jinoyat ishlari bo‘yicha Farg‘ona shahar sudiga yuborilgan.
Eslatib o‘tamiz, mart boshlarida Qashqadaryo viloyati Shahrisabz shahrida ichki ishlar organi xodimining ovqatlanib o‘tirgan joyiga bostirib kirib, tasvirga olgan va ijtimoiy tarmoqlarga tarqatganlarga chora ko‘rilgandi. Shuningdek, aprel oyida Toshkentda ichki ishlar xodimini o‘ldirib, yoqib yuborgan 3 erkakka hukm o‘qilgani to‘g‘risida xabar berilgan edi.
Izoh (0)