Бухорода йўл ҳаракати хавфсизлиги ходимларини обрўсизлантирувчи видео олиб, ижтимоий тармоқларда тарқатган ҳамда ҳақоратлаган икки нафар шахс жавобгарликка тортилди. Бу ҳақда вилоят ИИБ ахборот хизмати хабар берди.
Маълум бўлишича, ЙПХ ходими хизмат машинасида ўз вазифасини ўтаётган вақтида унинг ортидан ҳаракатланаётган бошқа бир автомобиль ичидаги фуқаролар инспекторни қоидабузарликда айблаб, тўхтатган. Улар тўхтаган инспекторни саволга тутиб, видеога олган. Ҳолатни англай олмаган ходимни гўлликда айлаб, унинг шаънига қўпол сўзлар ҳам ишлатган. Фуқаролар видеони қоидабузар инспектор қабилида ижтимоий тармоққа тарқатган.
Жиноят ишлари бўйича Бухоро туман суди томонидан ушбу суд иши мазмунан кўриб чиқилди. Суд қарорига кўра, инспектор қоидани бузмагани аниқланган. Икки фуқарога нисбатан эса Маъмурий жавобгарлик тўғрисидаги кодекснинг 183-моддаси (майда безорилик) билан БҲМнинг 20 баравари (6,8 миллион сўм) миқдорида жарима жазоси тайинланган.
Эслатиб ўтамиз, март бошларида Қашқадарё вилояти Шаҳрисабз шаҳрида ички ишлар органи ходимининг овқатланиб ўтирган жойига бостириб кириб, тасвирга олган ва ижтимоий тармоқларга тарқатганларга чора кўрилганди. Шунингдек, апрель ойида Тошкентда ички ишлар ходимини ўлдириб, ёқиб юборган 3 эркакка ҳукм ўқилгани тўғрисида хабар берилган эди.
Изоҳ (0)