Тошкентда репортаж олишга борган “Новости Узбекистана” нашри ходими ички ишлар ходимлари томонидан асоссиз олиб кетилиб, бир неча соат идорада ушлаб турилгани ҳақида хабар берилган эди. Олий суднинг хабар беришича, журналист айбсиз деб топилган.
Жиноят ишлари бўйича Учтепа туман судининг 2023 йил 16 январдаги қарорига мувофиқ Михаил Довлатов (1986 йилда Тошкент шаҳрида туғилган, “Новости Узбекистана” интернет-нашри мухбири)нинг ҳаракатида маъмурий ҳуқуқбузарлик аломати йўқлиги сабабли унга нисбатан Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) 1-қисми билан юритилган маъмурий ҳуқуқбузарлик тўғрисидаги иш Маъмурий жавобгарлик тўғрисидаги кодекснинг 271-моддаси (маъмурий ҳуқуқбузарлик тўғрисидаги ишларни юритишни истисно этувчи ҳолатлар) 1-бандига асосан тугатилди.
Ахборот ва оммавий коммуникациялар агентлиги ҳолат юзасидан маълумот берганди. Журналистнинг айтишича, ҳолат 14 январь куни Учтепа туманида содир бўлган. У 11-даҳада истиқомат қилувчи аҳоли билан учрашиши, улар ўз навбатида 150 га яқин гараж ҳамда 98 та дарахт ўрнига болалар боғчаси қурилаётгани тўғрисида маълумот бериши керак бўлган. Довлатов аҳоли билан соат 13:00 да воқеа жойида учрашишга келишган. Шунингдек, у ерда Учтепа тумани ҳокимлиги вакиллари, эколог ва бошқа экспертлар таклиф этилган.
“Автотураргоҳга киришдан 50 метр нарида бир гуруҳ эркакларга кўзим тушди, уларнинг айримлари ҳуқуқ-тартибот органлари формасида эди, шунингдек, Isuzu автозаки ҳам турарди. Улар ёнидан ўтар эканман, менга мурожаат қилишаётганини эшитиб қолдим, ўгирилганимда фуқаролик кийимидаги биттаси яна мени чақирди.
Ёнига бориб, гап нимада эканини билмоқчи бўлдим. У эса бу ерда чекиш тақиқланишини айтди. Мен атрофда тамаки чекишни тақиқлайдиган бирор белги йўқлигини билдирдим. У бўлса, бу ер жамоат жойи ҳисобланиши ва бу ерда чекиш умуман мумкин эмаслигини айтди”, — дейди журналист.
Шундан сўнг эркак уни туманнинг 2-сонли ички ишлар идорасига олиб борган, телефон ва техникалари олиб қўйилган. Идорада ундан нима учун митинг ташкиллаштирмоқчи эканини сўрашган. Бир неча соат ИИО ФМБда ушлаб турилган журналистга нисбатан Маъмурий жавобгарлик тўғрисидаги кодекснинг 194-моддаси (ички ишлар органлари ходимининг қонуний талабларини бажармаслик) бўйича жавобгарлик белгиланган.
Ахборот ва оммавий коммуникациялар агентлиги мазкур ҳолатга ҳуқуқий баҳо бериш ҳамда ҳуқуқни муҳофаза қилувчи органлардан муносабат билдиришлари, шунингдек, келгусида бундай ҳолатлар такрорланмаслиги мақсадида аниқ ўрганиш ҳамда тегишли хулоса ва чоралар кўрилиши бўйича Бош прокуратурага сўров хати юборган.
“Таъкидлаш жоизки, ОАВ вакилларининг касбий фаолияти давомида тазйиқ кўрсатиш, тўсқинлик қилиш каби ҳолатлар сўз ва матбуот эркинлигини таъминлаш борасидаги давлат сиёсатига зид бўлиб, агентлик, ўз навбатида, барча даражадаги давлат идоралари ходимларини ахборот қонунчилиги ҳамда журналистлар ваколатларига ҳурмат билан муносабатда бўлишга чақиради”, — дейилади агентлик муносабатида.
Изоҳ (0)