Майкл Жексон ҳақида биографик фильм суратга олинади. Фильм намойиши 2025 йилнинг 18 апрелига режалаштирилган.
Бош ролни хонанданинг жияни Жаафар Жексон ижро этади. Суратга олиш жараёнлари жорий йилнинг 22 январь санасидан бошланади. Фильм номи “Жексон” бўлиши кутилмоқда.
Унда поп қиролига айланган ажойиб, аммо мураккаб инсоннинг таъсирчан ва самимий портрети тасвирланади.
Картинада режиссёр Антуан Фукуа (“Менинг исмим Муҳаммад Али”, “Ўқдан тез”, “Машғулот куни”), сценарист Жон Логан (“007: Скайфолл координаталари”, “Авиатор”) ва продюссер Грем Кинг (“Богемия рапсодияси”) каби йирик лойиҳаларда иштирок этган ижодкорлар биргаликда ишлайди.
Бундан ташқари, Майкл Жексоннинг меросхўрлари Жон Бранк ва Жон Макклейн ҳам фильмда продюссер сифатида иштирок этади. Улар Жексоннинг болаларга нисбатан жинсий зўравонлик айбловлари қандай тасвирланишини кузатиб боради.
Майкл Жексон 2009 йил 50 ёшида вафот этган. У ҳаёти давомида ва ўлимидан кейин ҳам болаларга нисбатдан зўравонликда айбланиб келинаётган эди. 2019 йилда HBO телеканали мунозарали “Leaving Neverland” ҳужжатли фильмини чиқарди, унда хореограф Уэйд Робсон ва актёр Жеймс Сейфчак Жексон уларга жинсий тажовуз қилганини айтади. 2023 йилда АҚШ суди даъволарни қайта кўриб чиққан.
Изоҳ (0)