Комик актриса Анжела Есимбетова бу йил 38 ёшни қаршилади. Тўғри, унинг ижоди у қадар ранг-баранг эмас. Аммо экранда унинг ўзига хослиги яққол сезилади. У илк ролини икки ёшида дадаси Махсет Есимбетов суратга тушган видеофильмда ижро этган.
“Чақалоқлигимда онамдан айро яшаганман”
Анжела Есимбетова санъаткорлар оиласида дунёга келган. Актриса Қорақалпоғистонда хизмат кўрсатган артистлар Махсет Есимбетов ва Жумагул Сагиндикова хонадонида дунёга келган.
— Мен тўнғич фарзанд бўлганман, туғилганимда онам тўртинчи курс бўлган экан. Бош набира бўлганим учун бобом раҳматли “Сен ўқиш билан бўлиб болани қийнаб қўясан, Нукусда қолаверсин”, деб мени ўзи билан олиб қолган экан. Онам диплом спектаклига тайёргарлик кўриши кераклиги учун мажбур мендан узоқда бўлган. Бобом раҳматли жуда меҳрибон инсон эди, ҳафтада икки марта Нукус Тошкент йўналиши бўйлаб қатнайдиган самолётга билет олиб, бир қўлида мени, бирида бешигимни кўтариб, онамнинг олдига олиб келаркан. Ҳатто, аэропорт ходимлари ҳам бобом ва мени таниб қолган экан. Бобом раҳматли она сути ва меҳрига тўйсин деб бир кеча талабалар ётоқхонасида қолдирган. Онам “Шунчалик ширин қизалоқ эдингки, талабалар орасида талаш бўлардинг”, дейди. Бувим Света лақабли эчки боқарди, унинг сутини фақат ўзим ичардим. Бобо ва бувимнинг меҳрини кўриб улғайганман, шунинг учун ҳам 13 ёшимга қадар улар билан яшаганман, — дейди актриса.
“Агар рози бўлмасангиз, ўзимни ўлдираман”
Анжела санъаткор онаси негадир бу касбни танлашига жиддий қаршилик қилгани ҳақида гапирди.
— Мактабдаги энг аълочи ва ташкилотчи қиз бўлганман. Аммо мактабни битириш арафасида онам санъаткор бўлишимга жиддий қаршилик қилган. “Кераги йўқ, нима қиласан санъаткор бўлиб”, деб қаттиқ гапирган. Ёш бўлганим учун “Агар рози бўлмасангиз, ўзимни ўлдираман”, деб жонимга қасд қилишни ҳам режалаштирганман. Кейин аранг кўндириб, Тошкентга келганман ва институтга ҳужжатларимни топширганман. Ўша йили Дилноза Кубаева ва Улуғбек Қодиров ҳам ҳужжат топширганди. Аслида улар билан курсдош бўлишим керак эди, аммо шартнома асосида ўқишга кирганим учун ўқиёлмаганман. Балки онам “Пул тўламасак, ўқишдан кўнгли совийди”, деб ўйлагандир, билмадим. Ҳафсалам пир бўлиб, яна Нукусга қайтиб кетгандим. Бир йилдан кейин яна ҳужжат топширмоқчи бўлганман. Аммо яна онам билан низоли вазият юзага келганидан кейин ўзим Тошкентга келиб, ҳужжатларимни дугонам жўнатиб юборишини сўраганман. Чунки онам ҳужжатларимни беришни истамаганди, — дейди актриса.
“Мен ўзбек бўлиб туғилишим керак эди”
Актриса бугунги кунда ўзбек тилида эркин гаплаша олади, аммо у бир неча йил аввал бу тилни умуман билмаганини яширмайди.
— Қорақалпоқ оиласида дунёга келганман. Ўн биринчи синфга қадар қорақалпоқ мактабида ўқиганман. Мактабимизда фақат ҳафтада бир соат ўзбек тили ва рус тили дарслари бўларди. Ўқитувчиларнинг камлиги ёки бошқа сабаблар билан ўзбек тили дарслари ҳар доим ҳам бўлавермасди. Аммо мен ўзбек тилидаги китобларни кўп ўқирдим. “Ўзи мен ўзбек бўлиб туғилишим керак эди”, дердим. Тошкентга келган пайтимда бу тилда гаплашишга бир оз қийналганман, аммо вақт ўтгани сари ўз она тилимдек бўлиб кетган, — дейди актриса ва режиссёр Анжела Есимбетова.
“Ота-онамнинг санъаткор эканлигини яширганман”
Анжела Есимбетовани санъат олийгоҳига қабул қилишни исташмаган. Актриса бундан ранжигани ва ректорнинг қабулига киришга мажбур бўлгани ҳақида гапирди.
— Институтга ҳужжат топширган йилим Қорақалпоғистонда ҳам унинг филиали очилди. Шу боис Тошкентда эмас, прописка бўйича Нукусда ўқишим кераклигини айтишди. Ҳужжатларимни қайтариб беришганида жаҳлим чиқиб, тўғри институт ректорининг ёнига кирганман. “Мени ўзингиз имтиҳон қилинг. Агар курс қабул қилаётган ўқитувчиларингиз ўқитишни истамаса, индамай кетавераман”, деганман. Ўшанда курс раҳбарим Валижон Умаров курсига қабул қилишга рози бўлган. “Сенда туғма маҳорат бор, саҳна пластиканг бор”, деган гапни кўп айтарди. Аммо ота-онамнинг санъаткор эканлигини анча вақтгача сир тутганман. Чунки уларнинг номидан фойдаланишни истамаганман, — дейди актриса.
“Тошкентда идиш-товоқ ювувчи бўлганман”
Актриса онасининг санъат институтида ўқишига қарши бўлгани учун унга моддий кўмак бермагани ва ўзи ишлашга мажбур бўлгани ҳақида айтади.
— Ота-онамдан моддий ёрдам олмай ўқийман, деб ўз-ўзимга сўз бергандим. Шу боис, биринчи курсдан бошлаб ишлашимга тўғри келган. У пайтлари талабаларнинг ишлаши оддий ҳол эди. Вилоятлик қиз-йигитларнинг кўпчилиги ўқишдан кейин ошхоналарда ишларди. Мен ҳам тамаддихоналарда идиш-товоқ ювувчи бўлиб ишлаганман. Чунки шартнома пулини тўлаш ва қўшимчасига Тошкентда яшаш учун ҳам ҳаракат қилишим керак эди. Нукусга қайтиб борсам “Уддалай олмади”, деган маломатга қолишдан қўрқардим, — дейди актриса.
“Дадам саратонга чалинди”
Актриса отасининг оғир дардга чалингани ва узоқ вақт касаллик билан курашгани ҳақида гапирди.
— Отам ниҳоятда самимий ва одамлардан ёрдамини аямайдиган инсон эди. Жаҳлдор бўлиб кўринса-да, ниҳоятда меҳрибон инсон эди. Иккинчи курсда ўқиётганимда отам жигар циррози касалига чалинди. Шу боис, академик таътил олишга тўғри келди. Чунки отам касаллик билан курашаётган пайтда ўқий олмасдим. Ўша вазиятда оиламиз кўплаб молиявий қийинчиликларга учраган. Касалликка чалинган инсонлар буни жуда яхши билади. Дадамни даволатиш учун қўлдан келганча ҳаракат қилганмиз. Аммо касаллик зўрайиб, саратонга айланиб кетган. 2016 йилнинг 10 январь куни дадамнинг жони узилган. Бир кундан кейин, туғилган кунимда ҳаётимдаги энг яқин инсоним дадамни тупроққа қўйганмиз.
Дадамни йўқотганимдан кейин 3-4 йил умуман туғилган кунимни нишонлашни истамай қолгандим. Чунки бу кун ҳаётимдаги энг ёқимсиз хотира билан муҳрланиб қолганди, — дейди актриса.
“Ортиқча вазним саломатлигим билан боғлиқ”
Актриса ортиқча вазни ва “Озсангиз бўлмайдими?” деб ёзадиган негативчиларга муносабат билдирди.
— Тўғри, аввалдан хипча бел, озғин бўлмаганман. Аммо вазним ҳам бу қадар катта эмасди. 78 кг эдим ва қоматим чиройли эди. Аммо ундан кейин ҳаётда катта стрессларни бошдан кечирдим. Унинг устига буқоқ билан боғлиқ касаллик сабаб, ортиқча вазн тўпладим. Ортиқча вазним борлигини яхши биламан, буни доим эслатиб туриш шарт эмас. Нима қилай, ҳамма қатори еб-ичиб, ҳаракат қиламан. Аммо танамдаги ўзгаришлар еб-ичишим билан боғлиқ эмас. “Ошқозонингизни операция қилдирсангиз бўлмайдими?” дейишади. Одамнинг саломатлигини билмай туриб ақл ўргатиш осон, мен буни етти ўлчаб бир кесишим керак, — дейди актриса.
“Бундай роллардан зерикканман”
Анжела Есимбетова режиссёрлар асосий ролларни бермаслиги ва қаҳрамонларини фақат овқатга боғлашидан ранжиётгани ҳақида гапирди.
— Асосий қаҳрамон ёш ва чиройли бўлиши керак, деган талаб йўқ. Голливудда 40-50 ёшда ҳам актрисаларга бош ролларни беришади, қоматидаги камчилик ҳам аслида бунга тўсқинлик қилмаслиги керак. Аммо биздаги режиссёрлар бундан чўчийди. Аввалига эътибор бермасдим, ҳозир ролга таклиф этишса “Яна қаҳрамоним овқат ейдими?” деб сўрайдиган бўлганман. Чунки бундай роллардан зерикканман. Мен ҳам драматик ролларни ижро этгим, қаҳрамоннинг дардини очиб бергим келади, — дейди актриса.
“Менинг ҳам оила қургим келади”
Актриса нега шу ёшига қадар турмушга чиқмагани ва дадаси билан боғлиқ армонлари ҳақида сўзлаб берди.
— Оилада тўртта қизмиз, укам ҳам бор. Аммо негадир дадам менга “Қачон оила қуриб, мени набиралик қиласан?” дерди. Балки бош фарзанд бўлганим учун болаларимни кўришни орзу қилгандир. Сингилларим турмушга чиқди, шириндан-шакар фарзандлари бор. Аммо дадам раҳматли сўнгги кунига қадар тўйимни кўришни орзу қилди. Тақдир экан, унинг орзусини амалга ошира олмадим.
“Нега турмушга чиқмаяпсиз?” деб кўп сўрашади. Мени ҳам оила қургим келади, аммо пешонада нима ёзилганини билиб бўлмас экан. Пешонамга ёзилган инсонни кутяпман, — дейди актриса.
Изоҳ (0)