Венгрия Европа Иттифоқининг асосий сиёсий бошқарув органи бўлмиш Европа кенгашидаги овоз бериш ҳуқуқидан маҳрум қилиниши мумкин. Келгуси ҳафта Европарламент бу масалани кўриб чиқади.
Финляндия парламенти депутати Петри Сарвамаанинг Венгрияни овоз бериш ҳуқуқидан маҳрум этишга чақирувчи петицияси 120 та овоз тўплагани маълум қилинди.
“Имзолар тўпланди! Биз Орбанни овоз бериш ҳуқуқидан маҳрум қилишга бир қадам яқинлашдик. Фикр-мулоҳазалар кучли бўлди, бу тарихий петицияни қўллаб-қувватлаган барчага раҳмат. Мен турли партиялар ва Европа Иттифоқига аъзо бир қанча давлатлардан 120 та овоз тўпладим”, деб ёзади Сарвамаа.
Унинг сўзларига кўра, ҳозирда “петиция ғоясининг якуний умумий қўллаб-қувватланишини иложи борича тезроқ Европа парламентининг ялпи мажлислар залида баҳолаш ўта муҳим”.
“Бу келаси ҳафтадаёқ амалга ошиши мумкин, чунки кейинги ҳафта парламент Венгрия бўйича резолюцияни овозга қўяди”, деди Сарвамаа.
Унинг қайд этишича, Европарламентга тақдим этиладиган резолюциянинг ўзига хос мазмуни ҳали тасдиқлаш босқичида. Аммо, унинг сўзларига кўра, ҳужжат Европа Иттифоқи шартномасининг 7.2-моддасига асосланади. Айнан ушбу модда Европа Иттифоқига аъзо давлатнинг Европа Иттифоқи қоидалари ва қадриятларини такроран бузгани учун муайян ҳуқуқларини тўхтатиб туриш имкониятини назарда тутади.
Изоҳ (0)