Европа Иттифоқи аъзо давлатлар кафолатлари остида қарз олиб, Украинага 20 миллиард евролик ёрдам ажратиш имконини берувчи механизмни ишлаб чиқмоқда. Бу ҳақда Financial Times газетаси манбаларга таяниб хабар берди. Ушбу механизмдан фойдаланиб, ЕИ давлатлари Венгриянинг Украинага 50 миллиард евро ёрдам ажратишга қўйган ветосини четлаб ўтишни режалаштирмоқда.
Нашр манбаларига кўра, Европа Иттифоқи давлатлари умумий бюджет учун молиявий кафолатларни ўз зиммасига олади. Бу Европа Комиссиясига Украинага ёрдам бериш учун капитал бозорларидан зарур миқдорда қарз олиш имконини беради. Шунга ўхшаш механизм коронавирус пандемияси даврида иттифоққа аъзо мамлакатларга ёрдам учун 100 миллиард евро ажратишда ишлатилган.
Бундай механизм Европа Иттифоқига аъзо барча давлатларнинг розилигини талаб қилмайди – қарор кредит рейтинги юқори бўлган давлатлар томонидан қабул қилинади. Германия ва Нидерландия каби мамлакатларда буни амалга оширишдан олдин парламент розилигини олиш керак.
Яна бир вариант сифатида Европа Иттифоқи расмийлари Украинага арзон қисқа муддатли кредитлар беришни кўриб чиқмоқда. Ушбу схема бўйича Украина 2023 йилда аллақачон 18 миллиард евро олган.
Шу билан бирга, газета манбаларига кўра, ЕИ давлатлари учун Украинага 50 миллиард евро миқдорида ёрдам бериш бўйича келишиб олиш устувор вазифа ҳисобланади. Манбаларнинг айтишича, Европа Иттифоқи раҳбарияти Украинага март ойига қадар ёрдам кўрсатишга ваъда берган.
15 декабрь куни Европа Иттифоқи саммитида Венгрия бош вазири Виктор Орбан Украинага тўрт йилга кредит ва грантлар кўринишида 50 миллиард евролик ёрдам кўрсатишга вето қўйди. Бу масалани муҳокама қилиш учун Европа Иттифоқи давлатлари 2024 йил бошида фавқулодда саммит ўтказади.
Изоҳ (0)