Андижон ва Навоий вилоятларида электр энергияси ҳамда табиий газ тармоқларига ноқонуний уланиш ҳолатлари фош этилмоқда, деб хабар беради Бош прокуратура ҳузуридаги департамент.
Маълум қилинишича, департаментнинг Жалақудуқ ва Марҳамат тумани бўлимлари томонидан ЭТК ходимлари билан ҳамкорликда терговга қадар текширувлар ўтказилган. Текширувлар давомида якка тартибдаги тадбиркор О.С., “М.А.” МЧЖ масъул шахслари ва “С.” фермер хўжалиги раҳбари А.О. умумий фойдаланишдаги электр тармоқларига ўзбошимчалик билан тижорат мақсадида уланиб, жами 266,5 миллион сўмлик электр энергиясидан ноқонуний фойдалангани аниқланган.
Шу каби, департаментнинг Андижон шаҳар ва Қизилтепа туман бўлимлари томонидан ўтказилган терговга қадар текширувларда “Р.ф.” МЧЖ масъул шахслари ҳамда фуқаролар З.К. ва Н.Ж. умумий овқатланиш шохобчаси ва нотурар биносини ҳеч қандай ҳужжатсиз умумий фойдаланишдаги газ тармоғига улаб, жами 124,7 миллион сўмлик табиий газдан ноқонуний фойдалангани маълум бўлган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Ўзбекистонда декабрь ойининг 15 кунида айрим истеъмолчиларнинг электр энергияси ва табиий газдан ноқонуний фойдаланиши натижасида давлат манфаатларига 73 миллиард 274 миллион сўмлик зарар етказилгани тўғрисида хабар берилганди.
Изоҳ (0)