Эквадорда 12 йил давомида қамоқда ўтирган Los Choneros мафиоз гуруҳининг таниқли раҳбари Адольфо Масияс Вилямар (лақаби Фито) қамоқхонадан ғойиб бўлди. Бу ҳақда BBC хабар берди.
Вилямар сақланган камера Гуаякилдаги қамоқхонанинг бир қисмида жойлашган бўлиб, у назарий жиҳатдан юқори эҳтиёткорлик билан қўриқланиши керак. Эквадор президенти Даниэль Нобоа ҳолат юзасидан 60 кунлик фавқулодда ҳолат эълон қилди. Бу жамоат йиғилишларини вақтинча тақиқлаш ва комендантлик соатини ўз ичига олади.
“Наркотеррор гуруҳлари бизни қўрқитмоқчи ва биз уларнинг талабига бўйсунамиз деб ўйлашади. Аммо террорчилар билан музокаралар олиб бормаймиз ва мамлакатда тинчлик ўрнатмагунимизча тинчланмаймиз”, — деди президент Нобоа.
35 ёшли Даниэль Нобоа 2023 йилнинг октябрида бўлиб ўтган президентлик сайловларида ғалаба қозонган. Сайлов кампанияси вақтида номзодлардан бири, собиқ журналист ва мафияга қарши курашчи Фернандо Вилявиценсио ўлдирилган, сиёсатчига таҳдид қилган “Los Choneros” ва Фитонинг шахсан бу қотилликка алоқадорлиги гумон қилинмоқда.
Мафиоз қачон ғойиб бўлгани номаълум
Эквадор полицияси Фито ўз камерасида йўқлигини 7 январь (якшанба куни) аниқлаган. Улар уни қамоқхонанинг қаттиқ ҳимояланган қисми бўйлаб қидиришган, лекин топа олишмаган.
Фито қочиб кетганми ёки катта қамоқхона мажмуаси ичида яширинганми, ҳозирча аниқ эмас. Полиция, шунингдек, Фито камерадан аниқ қачон ғойиб бўлганини ҳам билмайди. Полиция бошлиғининг сўзларига кўра, юзлаб полициячилар Фитони қидирган ва қидирмоқда.
Минтақавий қамоқхона (La Regional) бешта ахлоқ тузатиш муассасасини ўз ичига олган қамоқхона мажмуасининг бир қисмидир. Уларда 12 мингдан ортиқ маҳбуслар сақланади.
2023 йилнинг август ойида Фито мажмуадаги бошқа қамоқхона – Ла Рокага кўчирилган эди. Бу кўпроқ ишончли муассаса ҳисобланади, чунки у ерда маҳбуслар камроқ. Фитонинг кўчирилиши бир неча минг аскар иштирокидаги ҳарбий операция сифатида ташкил этилган.
Аммо тез орада Фитонинг адвокати унинг кўчирилишига қарши апелляция берган ва ютиб чиққан, шундан сўнг мафиоз La Regional'га қайтарилган.
Мафиоз аввал ҳам қочиб кетган
Aввал ҳам Фито бир марта мазкур қамоқхонадан қочиб кетган. 2013 йилда у ва яна 17 маҳбус Ла Рокадан қочиб, мажмуага чегарадош дарё бўйлаб қайиқларга ўтишган.
Тўрт ой ўтгач, Фито ва унинг укаси, шунингдек, Los Choneros аъзоси, Манта шаҳридаги оналарининг уйида қўлга олинган. Ўшандан бери Фито қамоқдан чиқмаган. Шу билан бирга, у 2020 йилда, аввалги раҳбар Хорхе Луис Самбранонинг ўлдирилишидан сўнг, қамоқдаги гуруҳнинг етакчисига айланди.
Los Choneros асосан гиёҳванд моддалар савдоси ҳамда рекетчилик билан шуғулланади ва Мексиканинг кучли Синалоа картели билан ҳамкорлик қилади.
Изоҳ (0)