Сиёсатшунос Ойбек Сирожов “Дарё” билан суҳбат давомида ҳозирда Яқин Шарқ минтақасида юз бераётган Ғазо можароси ҳақида ўз фикрларини билдириб, Байрутда амалга оширилган бомбардимондан кўзланган асосий мақсад – “Ҳизбуллоҳ”ни урушга тортиш эканлигини айтиб ўтди.
Экспертнинг шарҳлашича, Исроил Ғазо секторини бутунлай тозалаб, ўз ҳудудига айлантирмоқчи.
— Яқин Шарқда бошланган можаро Ғарбни катта дилемма олдига қўйди. Чунки тинч аҳоли қурбон бўлаётганини геноцид деб атаётган кучлар Исроил амалга ошираётган ишлар олдида ожиз бўлиб қолди. Бу Россия учун қўл келмоқда. Аслида муаммога оддий ечим бор. Фаластинга мустақиллик бериш керак. Менимча, 2024 йилда энг ҳал қилувчи масала Эрон билан боғлиқ. Байрутда амалга оширилган бомбардимондан мақсад – “Ҳизбуллоҳ”ни урушга тортиш. Исроил аслида ҲАМАС билан “Ҳизбуллоҳ”га баравар уруш очмоқчи эди. Ғарбнинг таъсирида Исроил фақат ҲАМАСга уруш очди. Исроил Ғазо секторини бутунлай тозалаб, ўз ҳудудига айлантирмоқчи, – дейди Ойбек Сирожов.
Сиёсатшуноснинг таъкидлашича, АҚШ ҳозирда Украинадан кўра Яқин Шарққа эътибор қаратмоқда. Яъни Яқин Шарқда Хитой ва Россия таъсирини чеклаш учун Қўшма Штатлар ўз доналарини сурмоқда.
— 2024 йилда Яқин Шарқ можаросининг давом этиши дунёда юз берадиган воқеаларга боғлиқ бўлади. Назаримда, АҚШ ҳозирда Украинадан кўра Яқин Шарққа эътибор қаратмоқда. Чунки АҚШ Украина масаласида ўз олдига қўйган мақсадларига эришди. Яқин Шарқда Хитой ва Россия таъсирини чеклаш учун Қўшма Штатлар ўз доналарини сурмоқда. Бу ишни энг яқин иттифоқчиси Исроил қўли билан амалга оширмоқда. Масалан, Россиянинг Сурияда ҳарбий базаси бор – деди эксперт.
Мутахассис ўз фикрида давом этиб, Ғазодаги можаро глобал урушга айланиб кетиши Эронга боғлиқ эканлигини таъкидлади.
— Ҳозир Эрон оғир-босиқлик билан иш тутмоқда. Менимча, Россиянинг тажрибаси унга дарс бўлган. Чунки Ғарбга қарши ҳаракат бошлаш оғир оқибатларга олиб келиши мумкин. Агар Эрон урушга қўшилса, уни қўллаб-қувватловчи давлатлар масаласи ҳам бор. Шу нуқтаи назардан Эрон бу можарога оғир-босиқлик билан ёндошмоқда. Лекин Эронда юз берган портлашлар бу масалани тобора жиддийлаштирмоқда, – дейди сиёсатшунос Ойбек Сирожов.
Суҳбатнинг тўлиқ шаклини “Дарё”нинг YouTubeъдаги саҳифасида томоша қилишингиз мумкин.
Изоҳ (0)