Эрон ҳукумати ўз турмуш ўртоғини ўлдирганликда айбдор деб топилган Самира Сабзиан-Фардни қатл қилди. Бу ҳақда Норвегияда жойлашган Эрон Инсон ҳуқуқлари ташкилотига (IHR) таяниб, Iran International хабар берди.
Хабарга кўра, 15 ёшида турмушга чиққан Сабзиан-Фард 2013 йилда турмуш қурганидан тўрт йил ўтиб эрини ўлдиргани учун ўлим жазосига ҳукм қилинган. Марҳуманинг қариндошлари у оилавий зўравонлик қурбони бўлганини айтмоқда.
IHR директори Маҳмуд Amiri-Моғаддам аёлнинг қатл этилишини “самарасиз ва коррупциялашган ҳукумат ўзини сақлаб қолиш учун зўравонлик ва қўрқитишга мурожаат қилаётганининг ёрқин акси” деб таъкидлади. IHR халқаро ҳамжамиятни олий раҳбар Али Хоманаий ва Ислом Республикасининг бошқа расмийларини бундай ҳаракатлар учун жавобгарликка тортишга чақирди.
Сабзиан-Фарднинг ҳикояси ёшлигида турмушга чиқишга мажбур бўлган ва кейинчалик оилавий муаммолар қурбонига айланган Эрон аёлларининг тимсоли экани айтилмоқда. Эрон статистик марказининг сўнгги ҳисоботи қайғули далилларни очиб беради: биргина 2022 йилда Эронда 15 ёшгача бўлган камида 27 448 нафар қиз турмушга чиққан.
Шу билан бирга, мамлакатда никоҳни рағбатлантириш сиёсати кучайиб бормоқда. Бу ҳақда Эрон олий раҳнамоси Али Хоманаий таъкидлаган. Сўнгги йилларда қизларнинг турмуш қуриш ёшини пасайтириш ва оилаларни қизларининг турмушга чиқишига кўмаклашиш бўйича биргаликдаги саъй-ҳаракатлар амалга оширилмоқда.
Ҳар бешинчи никоҳ вояга етмаганлар билан тузилган, қизларга 13 ёшдан бошлаб турмушга чиқишга рухсат берилади. Режимнинг саъй-ҳаракатлари парламентнинг айрим аъзолари, ҳукумат амалдорлари ва турли маданий-маърифий муассасалар томонидан қўллаб-қувватланди.
Изоҳ (0)