“Толибон” Саноат ва савдо вазирлиги Афғонистоннинг Ўзбекистон билан савдо айланмаси 2023 йилда ошганини маълум қилди. Бу ҳақда TOLOnews хабар берди.
“Толибон” Саноат ва савдо вазирлиги матбуот котиби Охундзода Абдулсалом Жаваднинг айтишича, ўтган йили Афғонистон Ўзбекистон билан 266 миллион долларлик савдо айланмасини амалга оширган, 2022 йилда бу кўрсаткич 44 миллион доллар эди. Афғонистоннинг экспорти ўтган йили 27 миллион долларни ташкил қилган.
“2023 йилда Ўзбекистон билан ўзаро савдо алоқалари доирасида 27 миллион долларлик экспорт, 239 миллион долларлик импорт қилинди. Ўзбекистонга экспорт қилинадиган маҳсулотларимизнинг асосий қисмини қуритилган мевалар, мева шарбатлари, ўрик, кунжут, гиламлар, импорт қилинадиган маҳсулотларнинг асосий қисмини электр энергияси, ун, ловия, кимёвий ўғитлар, нефть ва газ ташкил этади”, — деди у.
“Толибон” Савдо ва сармоя палатаси Афғонистоннинг минтақа давлатлари билан савдо алоқаларини ошириш учун Ўзбекистон орқали Хитойга уланиш режаси борлигини таъкидламоқда.
Савдо-саноат ва инвестиция палатаси директорлар кенгаши раҳбари Мирвис Ҳотакнинг айтишича, толиблар Россия ва Европа билан ҳам боғланиш ниятида.
Айни пайтда афғонистонлик тадбиркорлар “Толибон” ҳукуматидан бизнес визасини бериш ва банк муаммоларини ҳал қилишни сўрамоқда. Улардан бири Залми Азимийнинг айтишича, афғон тадбиркорлари виза муаммоси сабаб бошқа давлатларга бора олмаяпти, бу масала билан “Толибон” ҳукумати шуғулланиши керак.
Аввалроқ “Толибон” ҳаракати саноат ва савдо вазири Нуруддин Азизий Ўзбекистон билан савдо ҳажмини йилига уч миллиард долларга етказиш бўйича ишлар олиб борилаётганини айтганди.
Изоҳ (0)