“Толибон” делегацияси Ўзбекистонга ташриф буюрди

“Толибон” ҳаракатининг Қишлоқ, ирригация ва чорвачилик вазирлиги делегацияси Ўзбекистонга ташриф буюрди. Бу ҳақда Hasht-e Subh Daily хабар берди.

 

Афғонистон Қишлоқ, ирригация ва чорвачилик вазирлиги Ўзбекистон билан “ҳамкорликни мустаҳкамлаш” учун Тошкентга жўнаб кетганини эълон қилди.

Ташриф давомида буғдой ва пахта уруғлари ҳосилдорлиги, гуруч етиштириш, томчилатиб суғоришни ривожлантириш, боғдорчиликни ривожлантириш, кадрлар малакасини ошириш, Афғонистоннинг қуритилган мевалари каби масалалар муҳокама қилинади. Инвестициялар ва бошқа соҳалар бўйича суҳбат олиб борилиб, шартномалар имзоланади.

Делегацияга “Толибон” Қишлоқ хўжалиги вазирлиги раҳбари ўринбосари Садразам Усмоний бошчилик қилмоқда ва унга қуйидагилар ҳамроҳлик қилган:

• Хон Моҳаммад Форутан — Афғонистон қишлоқ хўжалиги палатаси раҳбари;
• Ахтар Муҳаммад Аҳмадий — унинг ўринбосари;
• Моҳаммад Қосим Юсуфий — палата котибияти раҳбари;
• Сиддиқулла Раҳмоний — Қишлоқ хўжалиги вазирлиги уруғчиликни сертификатлаштириш бошқармаси бошлиғи;
• Мухтор Моҳсени — Қишлоқ хўжалиги вазирлиги ветеринария назорати бошқармаси бошлиғи;
• Ҳамидулла Аҳмадзай — Қишлоқ хўжалиги вазирлиги Тупроқшунослик бошқармаси бошлиғи;
• Муҳаммад Вали Вазирий — Қишлоқ хўжалиги вазирлиги бошлиғи маслаҳатчиси;
• Муҳаммад Рафи Баварий — Қишлоқ хўжалиги вазирлиги раҳбари ўринбосари маслаҳатчиси.