Қозоғистоннинг Олмаота вилоятидаги Жетиген қишлоғи вилоят аҳамиятига эга шаҳарга айланди. Тегишли фармонни президент Қосим-Жўмарт Тўқаев имзолади, дея хабар берди Оқўрда матбуот хизмати.
“Қозоғистон Республикасининг маъмурий-ҳудудий тузилиши тўғрисида”ги қонуннинг 9-моддасига мувофиқ, Олмаота вилоятининг Илий туманини ундан Жетиген қишлоғини ажратиб, уни қайта ташкил этишга қарор қиламан. Жетиген қишлоғи вилоят аҳамиятига эга шаҳарлар қаторига киритилсин ва унинг номи Олатау шаҳри деб ўзгартирилсин, — дейилади хабарда.
Қозоғистон ҳукуматига ушбу фармон бандларини амалга ошириш учун зарур чоралар кўриш топширилган. Фармон биринчи расмий эълон қилинган кундан эътиборан кучга киради.
Аҳоли пункти Олмаота марказидан тахминан 47 километр шимолда жойлашган. 2009 йилги аҳолини рўйхатга олиш маълумотларига кўра, қишлоқда 15 минг киши яшаган.
Изоҳ (0)