Германия томонидан Украинага етказиб берилган 18 та Leopard-2 танкининг деярли ярми эҳтиёт қисмлари алмаштирилмагани учун ишдан чиқди, деди Бундесвер генерал майори Кристиан Фрейдинг.
Унинг сўзларига кўра, энди бу танклар жанговар ҳаракатларда қўлланилиши учун таъмирлашни талаб қилади.
“Украинанинг ўзи танкларни таъмирлай олмайди. Ўз вақтида эҳтиёт қисмлари алмаштирилмаса танклар узоқ вақт хизмат қилолмайди”, — деди Фрейдинг.
Ҳозирда Германия расмийлари Киевга етказилган танкларни тўғридан-тўғри Украина ҳудудида таъмирлашга ёрдам бериш учун украиналик мутахассислар билан мулоқот ўтказмоқда. Унгача эса Leopard танклари вақтинча Литва техник хизмат кўрсатиш марказида таъмирланади.
Leopard танклари Украина армиясига шу йил ёзда тақдим қилинган. Улар Германия, Финляндия ва бошқа қатор Европа Иттифоқи мамлакатлари томонидан Украинага етказилди.
Россия Мудофаа вазирлиги ҳарбий ҳаракатлар давомида Европанинг ўнлаб зирҳли техникаси, шу жумладан турли модификациядаги саккизта Leopard танки йўқ қилинганини маълум қилган. 2 ноябрь куни Германия ҳукумати Украинага яна 25 та Leopard танкини топширишини эълон қилганди.
Изоҳ (0)