Эрон олий раҳнамоси Оятуллоҳ Али Хоманаий ҳарбий раҳбарларни ҳар қандай ҳолатда ҳам АҚШ билан тўғридан тўғри тўқнашувнинг олдини олишга чақирди. Бу ҳақда The New York Times хабар берди.
Хоманаийнинг фикрича, Эроннинг Керман шаҳридаги теракт Исроилнинг жаҳон ҳамжамиятини Ғазо секторидаги урушдан чалғитишга қаратилган кампаниясининг бир қисми бўлган.
“Бунга жавобан, Оятуллоҳ Исроилга қарши яширин амалиётлар ва прокси кучларнинг Ироқ ва Суриядаги Америка базаларига ҳужумлари билан чекланишни буюрди”, — дейди нашр суҳбатдошлари.
Уларга кўра, Хоманаий Эрон қўмондонларига “стратегик тинчликни” сақлаб қолиш ва исломий республика АҚШ билан тўғридан тўғри ҳарбий қарама-қаршиликка тушиб қолмаслиги учун ҳамма нарсани қилиш зарурлигини таъкидлаган.
Эрондаги теракт
Эронда 3 январь куни генерал Қосим Сулаймоний ўлимининг тўрт йиллиги хотирасига бағишланган дафн маросими чоғида портлашлар содир бўлди. Сулаймоний 2020 йил 3 январда Бағдод аэропорти яқинида АҚШнинг ракета зарбаси оқибатида ҳалок бўлган.
Теракт Сулаймоний дафн этилган қабристон яқинида юз берган. Эронлик журналистлар портловчи қурилмалар масофадан туриб бошқарилганини айтган. Эрон Бош прокуратураси Қосим Сулаймоний қабри ёнидаги теракт бўйича тергов бошлаган.
Эронда 4 январь миллий мотам куни деб эълон қилинган. Сўнгги маълумотларга кўра, терактда жароҳатланганлар сони 188 кишига етган, 103 киши ҳалок бўлган. Қурбонлар орасида Қизил ярим Ойнинг уч нафар ходими ҳам бор.
Изоҳ (0)