Исроил ўз иттифоқчиларига Эроннинг Керман шаҳридаги Ислом инқилоби посбонлари корпуси генерали Қосим Сулаймоний дафн этилган қабристондаги портлашларга алоқаси йўқлигини маълум қилди. Бу ҳақда The Wall Street Journal “Исроил амалиётларидан хабардор” манбаларга таяниб, хабар берди.
Нашр суҳбатдошларига кўра, портлашлар характери Исроилнинг Эрон хавсизлик кучлари ёки инфратузилмасини нишонга олувчи тахминий ҳужумлар схемасига мос келмайди.
Исроил бош вазири идораси ва Исроил армияси ушбу маълумотга изоҳ беришдан бош тортди.
Шу билан бирга, Эрон президенти Иброҳим Раисий портлашлар учун Исроилни айблаб, бунинг “бадали катта” бўлишини айтди.
“Мен сионистик режимни огоҳлантираман: содир этган жиноятларингиз учун оғир бадал тўлашга шубҳа қилманг”, — деди Раисий телевидение орқали қилган мурожаатида.
Америкалик таҳлилчиларнинг фикрича, Кермондаги портлашларда теракт белгилари бор. Оқ уйнинг исми ошкор этилмаган расмийси ҳам CNN телеканалига шу версияни айтди.
“Менимча, ҳақиқатан ҳам бу терактга ўхшайди — биз илгари кўрган ИШИД терактларига. Билишимча, бизнинг ҳозирги версиямиз шу”, — деди CNN манбаси.
АҚШ Давлат департаменти матбуот котиби Мэтт Миллернинг айтишича, АҚШ портлашлар ҳақида “ҳеч қандай мустақил маълумотга эга эмас” ва Давлат департаментида “Исроилнинг ҳодисага алоқадорлигига ишониш учун ҳеч қандай асос йўқ”.
The Wall Street Journal манбаларига кўра, портлашлардан мақсад — 2 январь куни ҲАМАС етакчиси Солиҳ ал-Арурий ўлдирилганидан кейин юзага келган таранглик даврида Исроил ва Эрон ўртасида келишмовчиликни келтириб чиқариш бўлиши мумкин. Газета суҳбатдошларига кўра, портлашларга Эрон ичидаги исломий мухолифат ташкилотлари алоқадор бўлиши мумкин, аммо улар бу нуқтаи назарни тасдиқловчи далиллар келтирмади.
Эрон генерали Қосим Сулаймоний дафн этилган қабристон яқинида портлашлар 3 январь куни, унинг вафотига тўрт йил тўлгани муносабати билан содир бўлди. Портлашлар оқибатида камида 95 киши ҳалок бўлди, 200 дан ортиқ киши жароҳатланди. Эрон давлат ахборот агентлиги IRNA хабарига кўра, портлашларга масофадан бошқариладиган бир жуфт қурилма сабаб бўлган.
Генерал Қосим Сулаймоний Эрон ташқарисидаги операцияларга ихтисослашган Ислом инқилоби гвардиясининг ал-Қудс кучларига қўмондонлик қилган. У 2020 йил 3 январда Америка самолётлари томонидан берилган ракета зарбаси оқибатида вафот этган.
2 январь куни Байрут чеккасида ҲАМАС сиёсий бюроси раҳбари ўринбосари Солиҳ ал-Арурий Исроил учувчисиз учоғи томонидан уюштирилган зарбада ҳалок бўлди. Шундан сўнг Эрон Исроилни Яқин Шарқдаги можарони кучайтираётганликда айблади.
Изоҳ (0)