Эронда 3 январь куни генерал Қосим Сулаймоний ўлимининг тўрт йиллиги хотирасига бағишланган дафн маросими чоғида теракт содир бўлди. Ҳодиса оқибатида 103 киши ҳалок бўлди, 211 киши жароҳатланди. “Дарё” улар орасида Ўзбекистон фуқаролари бор ёки йўқлигига ойдинлик киритиш учун Ташқи ишлар вазирлиги билан боғланди.
ТИВ матбуот котиби Аҳрор Бурхонов Эронда юз берган терактда қурбонлар ва жароҳатланганлар орасида Ўзбекистон фуқаролари йўқлигини маълум қилди. Эронда 3 январь куни юз берган портлашларда портловчи қурилмалар масофадан туриб бошқарилган. Ҳодиса Кермон шаҳрида, генерал Қосим Сулаймоний дафн этилган қабристон яқинида содир бўлган. Мамлакат Бош прокуратураси теракт бўйича тергов бошлаган.
Эрон олий раҳнамоси Оятуллоҳ Али Хоманаий ҳолат юзасидан ҳарбий раҳбарият билан йиғилиш ўтказган. Унда теракт Исроилнинг жаҳон ҳамжамиятини Ғазо секторидаги урушдан чалғитишга қаратилган кампаниясининг бир қисми бўлгани айтилган.
The New York Times нашрининг ёзишича, мазкур йиғилишда Хоманаий “стратегик тинчликни” сақлаб қолиш учун АҚШ билан зиддиятга бормасликни буюрган.
“Бунга жавобан, Оятуллоҳ Исроилга қарши яширин амалиётлар ва прокси кучларнинг Ироқ ва Суриядаги Америка базаларига ҳужумлари билан чекланишни буюрди”, — дейилади хабарда.
Эрон ҳукумати портлашлар муносабати билан 4 январь кунини миллий мотам куни деб эълон қилган. Хоманаий “душманлар бу фалокатга қаттиқ жавоб олишларини билишлари керак”лигини таъкидлаган.
Оқ уйга кўра, Эроннинг Керман шаҳридаги портлашлар “Исломий давлат” (Ўзбекистонда ҳаракати тақиқланган террористик ташкилот) террорчилик гуруҳининг ҳаракатларига ўхшайди.
Маълумот учун, Қосим Сулаймоний 2020 йил 3 январда Бағдод аэропорти яқинида АҚШнинг ҳаво ҳужуми оқибатида ҳалок бўлган. Эрон миллий хавфсизлик олий кенгаши Сулаймонийнинг ўлдирилишини АҚШнинг “энг катта стратегик хатоси” деб атаган. Теҳрон Вашингтонга “керакли вақтда керакли жойда” қасос олишга ваъда берган.
Изоҳ (0)