“Толибон” ҳаракати матбуот котиби Забиҳуллоҳ Мужоҳид ҳаракат етакчиси Ҳайбатуллоҳ Охундзода нега суратлар ва видеоларда кўриниш бермаслиги сабабини тушунтирди. Бу ҳақда Шафақна хабар берди.
Мужоҳиднинг сўзларига кўра, “Толибон” етакчиси сурат ёки видеога тушишни ёқтирмайди, чунки у “тўлиқ тақво”да яшашни истайди.
“Амирнинг суратга тушмаслиги шариат масаласидир. Амир бу масалаларга қизиқмайди ва тақводордир. Кўпчилик уламоларимизнинг тақво нуқтаи назаридан суратга ва видеога олиш борадаги фикрлари ўхшашдир”, — дейди Мужоҳид.
“Толибон” матбуот котиби биринчи марта Охундзода суратлари чоп этилмагани сабаби ҳақида расман гапирди. Аввалроқ унинг видеоматериалларда кўринмаслиги хавфсизлик сабаблари бўлиши мумкинлиги ҳақида тахминлар бўлганди.
“Шариат нуқтаи назаридан баъзи мулоҳазалар борки, мусулмонлар амири тақвонинг охирги даражасида бўлишни хоҳлайди. У ҳақида сурат ва видео олинмаса ҳам, бу ҳеч ким кўрмаганини англатмайди ва яшириниб юргандек эмас. У йиғилишларда қатнашган, вилоятларда бўлган, уни ҳамма кўрган”, — дейди “Толибон” матбуот котиби.
Айни пайтда, “Толибон” раҳбаридан ташқари, барча юқори мартабали амалдорлар ўзи ва фаолияти акс этган видео ва фотосуратларни нашр этади, интервьюларда кўриниш беради.
Ҳозирча Қандаҳорда жойлашган “Толибон” етакчисининг фақат битта сурати расман чоп этилган, аммо ҳозирча Ҳайбатуллоҳ Охундзоданинг бирорта ҳам видеоси эълон қилинмаган. “Толибон” етакчисининг хабарлари одатда аудио ёки ёзма шаклда чоп этилади.
Изоҳ (0)