“Толибон” олий етакчиси мулла Ҳайбатуллоҳ Охундзода Рамазон ҳайити муносабати билан йўллаган табригида дин пешволари халқни “Толибон”га қарши ҳар қандай “исён”дан қайтариши кераклигини айтди, деб хабар бермоқда “Дарё”нинг Афғонистондаги мухбири.
Мулла Ҳайбатуллоҳ Охундзода Афғонистондаги диний уламоларнинг зиммасидаги вазифаларга ишора қилиб, уларга масжид минбарларида ваъз ўқиш орқали исломий тузум қадриятларини халққа тушунтиришни буюрди.
“Толибон” етакчиси, шунингдек, маданий, таълим, иқтисодиёт ва медиа соҳаларида ислоҳотлар амалга оширилганини таъкидлаб, ёт ғояларнинг таъсири тугатилишини айтди.
Охундзоданинг табригида “Толибон” суд-ҳуқуқ ислоҳотлари, савдо-сотиқ вазирлик фаолияти, қўшни давлатлар ва дунёнинг Афғонистон ички ишларига аралашуви, “Толибон” аскарларининг мажбуриятлари, хавфсизлик ва бошқа масалалар тилга олинган.
“Толибон” етакчиси дунё билан муносабатларга тўхталиб, G7 давлатлари ташқи ишлар вазирларининг Японияда бўлиб ўтган йиғилишида халқаро ҳамжамиятнинг “Толибон” билан муносабатларини нормаллаштириш масаласи муҳокама қилинганини айтди. Вазирларга кўра, бу жараён “Толибон” ҳукуматининг ҳаракатларига боғлиқ бўлади.
17 апрель куни АҚШ Давлат бош котиби Энтони Блинкен ҳам Twitter’даги саҳифасида бу масала G7 ташқи ишлар вазирлари йиғилишида муҳокама қилинганини ёзди, аммо тафсилотларни келтирмади.
Аввалроқ Ҳайбатуллоҳ Охундзода мамлакатдаги қозиларни халққа зулм қилишни тўхтатишга ва “адолатни” таъминлашга чақирган эди.
Изоҳ (0)