Марказий Осиё давлатлари энг арзон ва энг кўп сув истеъмол қилади — тадқиқот

Ўзбекистон ва бошқа Марказий Осиё давлатлари дунёдаги энг арзон ва энг кўп сувни истеъмол қилади. Aquastat тегишли тадқиқот натижаларини эълон қилди.

Маълум қилинишича, Марказий Осиё давлатлари сувдан жуда катта ҳажмларда фойдаланиши билан ажралиб туради ва сувни тежашга шошилмаяпти, бу эса экологик муаммолар ва танқисликка олиб келади. 2020 йилда Ўзбекистонда сув истеъмоли киши бошига 1.76 минг кубометрни ташкил қилган. 

Қозоғистонда 1,31 минг куб метр, Туркманистон 4,35 минг куб метр, Озарбайжон 1,24 минг куб метр, Қирғизистон 1,17 минг куб метр ва Тожикистон 1,04 минг куб метр сув истеъмол қилган. Сув истеъмолининг анча юқори даражаси Арманистон (аҳоли жон бошига 954,7 куб метр), Россия (444,2 кубометр) ва Грузияда (414,6 кубометр) сезиларли даражада қайд этилган. Украина, Молдова ва Беларусда эса кўрсаткичлар сезиларли даражада паст.

“The International Benchmarking Network for Water and Sanitation Utilities” маълумотларига кўра, 2021 йилда Ўзбекистон сув таъминоти бўйича дунёнинг 90 та давлати орасида “энг арзон” бешликка кирган. Бир куб метр сувнинг нархи атиги 0,15 долларни, Тожикистонда 0,1 долларни, Қозоғистонда эса 0,14 долларни ташкил этган. Таққослаш учун: Данияда сув нархи Қозоғистонникидан 25 баробар, Швецияда 22 баробар юқори.

“Арзон бўлса, тежаш шарт эмаслиги нотўғри ёндашув”, — деб таъкидлаган материал муаллифлари.

Тадқиқотчиларнинг эслатишича, сув Ер юзасининг қарийб 70 фоизини ташкил қилишига қарамай, ичимлик суви кўринадиган даражада кўп эмас — атиги 3 фоиз. БМТ маълумотларига кўра, бир миллиарддан ортиқ одам сувдан етарли даражада фойдалана олмайди ва яна 2,7 миллиард киши йилига камида бир ой давомида сув танқислигини бошдан кечиради.