НАТО бош котиби Йенс Столтенберг 4 июнь куни Истанбулда Туркия президенти Ражаб Тоййиб Эрдўғон билан учрашганидан сўнг Швеция Анқаранинг талабларини бажарганини ва НАТОга аъзо бўлиш ҳуқуқига эга эканини айтди.
“Швеция Туркиянинг талабларини қондириш учун муҳим ва аниқ қадамлар қўйди. Швеция ўз мажбуриятларини бажарди”, — деб таъкидлади Столтенберг Стокгольм томонидан қонунчиликка киритилган ўзгартиришларни эслатиб.
“НАТОга аъзо бўлиш Швецияни хавфсизроқ қилади, НАТО ва Туркияни ҳам кучайтиради”, — дея унинг сўзларини келтиради AFP. НАТО бош котиби Эрдўғон билан келгусида Швеция иштирокида Мунтазам қўшма механизм йиғилишини ўтказишга келишиб олганини айтди.
Швеция ва Финляндия 2022 йилда – Россиянинг Украинага кенг кўламли босқинидан кўп ўтмай, НАТОга аъзо бўлиш учун ариза берган эди. Мамлакатларнинг альянсга қўшилиши учун унинг барча аъзолари аризани маъқуллаши керак эди. Туркия Швецияни Курдистон Ишчилар партиясига алоқадор ўнлаб одамларни Анқарага топширишдан бош тортишда айблаб, унинг НАТОга қўшилишига қарши чиқди.
Апрель ойи бошида Туркия Финляндиянинг альянсга киришини ратификация қилди, бироқ Стокгольм Анқара террорчи деб ҳисоблаган жангари гуруҳлар аъзоларига бошпана бераётганини айтиб, Швециянинг аъзолигига эътироз билдиришда давом этди. Май ойида Швеция парламенти терроризмга қарши кураш бўйича мамлакат қонунларини қатъийлаштиришга қаратилган тузатишларни қабул қилди. Бу ҳаракат Туркияни кўндиришига ёрдам бериши кутилмоқда.