Тайван “албатта” Хитой билан бирлашади, деди Хитой етакчиси Си Цзиньпин мамлакат асосчиси Мао Сзедун таваллудининг 130 йиллигига бағишланган нутқида. Бу ҳақда Nikkei Asia хабар берди.
“Биз кимлардир қандайдир йўллар билан Тайванни Хитойдан ажратишига қатъий тўсқинлик қиламиз”, — деди Си.
Тайван 1949 йилда Хитойдан мустақиллигини эълон қилган. Пекин ҳамон оролни ўзининг сепаратист вилояти деб билади. Бироқ Тайпей ХХР таклиф қилган “Бир давлат, икки тизим” моделини рад этиб келади.
Аввалроқ CNBC Си Цзиньпин Америка президенти Жо Байден билан ноябрь ойида Сан-Францискодаги учрашуви чоғида Тайванни материк Хитой билан бирлаштиришга ваъда бергани ҳақида ёзганди. Телеканал маълумотларига кўра, учрашув олдидан Хитой томони Байдендан Хитойнинг Тайван билан тинч бирлашиш жараёнини қўллаб-қувватлашини, шунингдек, орол мустақиллиги АҚШ томонидан қўллаб-қувватланмаётганини очиқ эълон қилишни сўраган. Оқ уй бу талабни рад этган.
Си Цзиньпин Пекин тинч йўл билан бирлашишни афзал кўришини таъкидлаган. CNBC хабарига кўра, Хитой раҳбари Тайванда бўлиб ўтадиган президентлик сайловлари ва АҚШнинг уларга таъсиридан ҳам хавотир билдирган. Байден эса уни оролдаги сайлов жараёнини ҳурмат қилишга чақирган. Бунга жавобан Си “тинчлик яхши, аммо Пекин вазиятни ҳал қилиши керак” деб айтган.
2022 йилнинг кузида, партия қурултойида Си Цзиньпин ташқи кучлар вазиятга аралашган тақдирда Тайванга қарши куч ишлатишга тайёрлигини очиқчасига эълон қилди. У армияни ҳақиқий жанговар ҳаракатларга тайёрлаш зарурлигини бир неча бор таъкидлаган. Пекин Тайванга эгалик қилиш масаласида муросага келиш имкониятини истисно қилиб келади.
Изоҳ (0)