Сурхондарё вилоятида мактаб учун кутубхона ва касб-ҳунар маркази қуриб берган тадбиркор аёл “Таълим ҳомийси”, деган номга муносиб кўрилди. Бу ҳақда “Дарё”га вилоят мактабгача ва мактаб таълими бошқармаси ахборот хизмати раҳбари Дилдора Мусаева хабар берди.
-64ioz4cF.jpg)
Мактабга ҳомийлик қилган тадбиркор вазир Ҳилола Умарованинг ҳам эътирофига сазовор бўлган.
Масъулнинг маълумот беришича, Сариосиё туманининг “Себзор” маҳалласида яшовчи тадбиркор Мамлакат ая Фаттоева 2022 йил ҳудуддаги 82-мактабга 400 миллион сўмга яқин маблағ эвазига замонавий кутубхона қуриб берган.
Тадбиркор аёл ҳомийлигини давом эттириб, 2023 йилда шу мактаб ўқувчилари учун касб-ҳунарга ўргатиш маркази ҳам қуриб берди. 2023 йилнинг 16 ноябрь куни вилоятда бўлган мактабгача ва мактаб таълими вазири Ҳилола Умарова шу мактабга бориб, Мамлакат ая Фаттоеванинг мактаб ривожи учун қўшган ҳиссасини эътироф этиб, онахонга ўз миннатдорлигини билдирганди. Термиз шаҳрида бўлиб ўтган ўқитувчилар қурултойида Мамлакат ая Фаттоева “Таълим ҳомийси” кўкрак нишонига муносиб кўрилди, — дейди у.
Қўшимча қилинишича, вилоятда бўлиб ўтган ўқитувчилар қурултойида мактабгача ва мактаб таълими вазирининг биринчи ўринбосари Усмон Шарифхўжаев, Сурхондарё вилояти ҳокими Улуғбек Қосимов ҳам иштирок этган.
Тадбирда 2023 йил давомида вилоятда 250 дан ортиқ мактаб таъмирлангани, ҳудуддаги мактабларнинг моддий-техник базасида катта ўзгариш бўлгани таъкидланган.
Шундан сўнг таълим-тарбия тизимига муносиб ҳисса қўшган педагогларнинг 7 нафарига “Халқ таълими аълочиси”, бир нафарига “Халқ таълими фидойиси”, яна бир нафарига “Таълим ҳомийси” кўкрак нишонлари топширилди. 5 нафар ўқитувчи мактабгача ва мактаб таълими вазирининг фахрий ёрлиқлари, қолаверса Ангор туманидаги 1- ҳамда Бойсун туманидаги 2-умумтаълим мактаблари жамоаси вазир ташаккурномалари билан тақдирланди, — дейди Дилдора Мусаева.
Изоҳ (0)