Олий Мажлис Қонунчилик палатаси депутати Умида Раҳмонова мактаблардаги янги дарсликлар мазмуни, шакли ва концепциясини ўрганишга қарор қилди. Бу ҳақда у ўз саҳифасида ёзиб қолдирди.
.jpg)
Умида Раҳмонованинг айтишича, қизи айни пайтда 2-синф ўқувчиси бўлиб, фарзандининг сифатли таълим олиши у учун жуда муҳимдир.
“Баъзан иш, баъзан бошқа сабаблар билан бўлиб, 2-синфда таҳсил оладиган қизимнинг дарс тайёрлашига ёрдам бера олмай қолаётгандим. Лекин охирги вақтларда ҳамма баҳона ва сабабларни бир четга суриб, уй вазифаларини биргаликда тайёрлашга ҳаракат қиляпмиз.
Қизимнинг сифатли таълим олиши мен учун жуда муҳим. Шу боис кейинги вақтларда мактаблардаги таълим дастури ёки дарсликлар ҳақида билдирилаётган турли хил фикр ва изоҳларни алоҳида қизиқиш билан кузатиб боряпман”, — дейди депутат.
Умида Раҳмонова ҳам она, ҳам депутат сифатида дарсликларнинг мазмуни, шакли ва концепциясини ўрганиб, бу борада ўз фикрларини бўлишиб боришини билдирди.
Мактаб дарсликлари замонавий таълим стандартларига жавоб бериши баробарида ўқувчини қизиқтириши ва фанга бўлган меҳрини уйғотиши керак. Бошланғич синф дарсликларининг тубдан янгилангани нафақат ўқувчи ва ўқитувчиларни, балки ота-оналарни ҳам қувонтиргани айтилмоқда.
Андижон туманидаги 54-умумий ўрта таълим мактабида 10 йилдан буён бошланғич синфда дарс бериб келаётган Илмира Мусина “Дарё” мухбири билан бўлган суҳбатда янги дарсликлар аввалгиларига нисбатан ўзининг ранг-баранглиги ҳамда ўқувчилар учун берилган топшириқларнинг қизиқарли экани билан фарқ қилишини айтганди.
“Олдинги дарсликларимиз муаллифлари таълим соҳасида ишлаган бўлса ҳам, болалар билан ишламаганликлари учун ўқувчини қизиқтириши қийин эди. Янги дарсликлар муаллифларининг аксарияти бошланғич синфлар ўқитувчилари бўлгани боис ҳар бир ўқувчининг характеридан келиб чиқиб, тайёрлангани яққол кўзга ташланмоқда. Бу эса ўйинқароқ, қизиқмайдиган ёки ўзлаштириши қийин бўлган болаларни ҳам ўзига жалб этиб, ўқишга қизиқтира оляпти, — деган эди у.
Таълимни ривожлантириш республика илмий-методик маркази директори Воҳид Ҳамидов ҳам янги дарсликларни яратишда болалар психологияси ҳам ҳисобга олинганини таъкидлаганди.
Изоҳ (0)