Қашқадарё вилоятида фаолият юритувчи тадбиркор Нурбек Эргашев чекка ҳудуд аҳолиси фарзандлари учун ҳомийлик асосида мактаб қуриб берди. Бу ҳақда “Дарё”га вилоят ҳокимлиги ахборот хизмати хабар берди.
Таъкидланишича, бугун ушбу мактаб очилишига бағишланган тадбир бўлиб ўтган.
Мактаб биноси “Султон тех” корхонаси ҳомийлигида қайта таъмирланиб, замонавий кўринишга келтирилди. Шунингдек, синфхоналар жиҳозланиб 44-сонли янги мактаб деб эътироф этилди, — дейди ҳокимлик ахборот хизмати раҳбари Аҳрор Содиқов.
Ҳокимлик ахборот хизмати раҳбарига кўра, мактабнинг очилиш маросимида вилоят ҳокими Муроджон Азимов бошчилигидаги сектор раҳбарлари, оқсоқоллар ва қишлоқ аҳли иштирок этган.
Тадбиркор ҳомийлигида ушбу мактаб ўқувчилари учун мини стадион қуриш ишлари давом этмоқда.
Президентимиз томонидан олиб борилаётган иқтисодий ислоҳотлар биз тадбиркорларнинг даромадимиз кўпайиб, шундай ҳомийликлар қилишимизга замин яратмоқда. Тадбиркор сифатида бундан кейин ҳам ижтимоий соҳани қўллаб-қувватлаб, туман, вилоят ва республика миқёсида йирик лойиҳаларни амалга оширишда давом этамиз, — дейди тадбиркор.
Фото: Қашқадарё вилояти ҳокимлиги
Тадбиркор мазкур мактаб учун қанча маблағ сарфлаганини очиқлашни истамади.
Илм-фан ҳар доим қўллаб-қувватлашга боғлиқ бўлган. Қаерда илмга эътибор кучли бўлса, ўша ерда ривожланиш бўлган. Буюк сиёсатчилардан бири Бенжамин Франклин “Энг яхши инвестиция — билим олиш учун киритилган инвестициядир”, деган эди. Шунинг учун барчамиз имкониятларимизни кўпроқ фарзандларимиз илмли бўлиши учун сарфлашимиз лозим деб ҳисоблайман, — дейди тадбирда сўз олган тадбиркор Нурбек Эргашев.
Аҳрор Содиқовнинг қўшимча қилишича, ушбу мактаб қурилишидан миннатдор бўлган аҳоли тадбиркорга зарбоф тўн кийдириб, миннатдорлик изҳор қилган.
Изоҳ (0)