Нега уй ҳайвонларимизни жуда яхши кўрамиз? Чунки улар бизни кўрганларида доимо чин дилдан хурсанд бўлади, биз эса уларни кўрганимиздан. Жониворлар ўзларининг ҳис-туйғуларини думини ликиллатиб, кўзлари билан кўрсата олмайди. Шунинг учун уларнинг катта экранда пайдо бўлиши томошабинларга ўзгача завқ беради.
Оқ бойқуш — “Гарри Поттер”
Ҳагрид туғилган кунида совға қилган қутб бойқуши Гарри Поттернинг содиқ дўсти бўлади. Барча бойқушлар сингари у ҳам хатларни етказиб беради ва жўнатмаларни қаерга олиб боришни жуда яхши билади. Бойқуш ёш сеҳргарлар келишидан олдин белгиланган жойга учиб борар, гапира олмаса ҳам эгасига жуда садоқатли эди. Суратга олиш жараёнида у қийин трюклардан бирини — Поттерга “Нимбус 2000” супургисини етказиб беришни уддалайди. Қушни бу ҳаракатни бажаришга ўргатиш учун мураббийларга деярли олти ой керак бўлади.
Хатико — “Хатико”
Фильм Японияда содир бўлган реал воқеага асосланган бўлиб, эгаси вафотидан кейин уни 9 йил давомида станцияда кутган содиқ акита-ину зотли ит ҳақида ҳикоя қилади. Хатико садоқат тимсолига айланади ва унга атаб ёдгорлик ўрнатилади. Жониворнинг суяклари Токиодаги Миллий фан музейида сақланади. Ричард Гир иштирокидаги Голливуд фильмида Хатико ролини Чико, Лила ва Форест исмли учта акита-ину итлари ижро этган. Уларнинг ҳар бири шахсан танлаб олинган ва олти ой давомида мураббий Бун Нарр томонидан ўргатилган. Фильмнинг суратга олиш майдончасида Америка ҳайвонлар ҳуқуқлари ассоциацияси (AHA) вакили Мариса Беллис ҳам бўлган. У итларнинг етарлича овқат еб, дам олишини назорат қилган. Унинг ташаббуси билан уй ҳайвонлари совқотиб қолмаслиги учун кийим тикилган, чунки суратга олиш ишлари қишда бўлган.
Далматинлар — “101 далматин”
Уйингизда 101 та далматин итларини тасаввур қила оласизми? Суратга олиш жараёнида 20 та катта ёшли ит ва 230 га яқин кучук иштирок этган. Кичкина далматинлар жуда тез ўсганлиги сабабли режиссёрлар ҳар 2 ҳафтада жониворларни алмаштиришларига тўғри келади, чунки фильмда улар бир хил ёшда бўлиши керак эди. Эгалари хурсанд бўлиши учун кучукчаларга фильмда ўйнаганликлари ҳақида гувоҳнома берилади. “101 далматин” экранларга чиқгач, шундай зотли итлар бир зумда дунёга машур бўлиб кетади.
Мушук Салем — “Сабрина-митти жодугар” телесериали
Гапирувчи қора мушук Салем ўзининг ақлли сўзлари ва барча ҳолатларга тайёр турадиган кўз ёшлари туфайли омманинг севимлисига айланади. Фильмда Салем ёш жодугар Сабринанинг таниши ва дунёни эгаллашга урингани учун ҳайвон танасига қамалган сеҳргардир. Сериалдаги аксарият саҳналарда ёзувчи ва актёр Ник Бакай овоз берган анимацион мушук моделидан фойдаланилган. Диалогсиз саҳналарда тўртта ўргатилган мушук: Элвис, Люси, Салем ва Жодугар иштирок этади.
Сенбернер Бетховен — “Бетховен”
Сенбернер зотига тегишли Бетховенни худди шу номдаги фильмда Крис исмли ит ўйнаган. Томошабинлар уни қувноқ ҳаракатлари ва оила бошлиғи Жорж билан чиқишолмаслиги орқали эслашади — у уйда ит боқишга ҳар томонлама қарши эди. Бетховен ёвуз ветеринар қўлига тушиб қолгач, бош қаҳрамон уй ҳайвонига бўлган меҳрини англаб, уни қутқариб қолади.
Дастлаб фильмда ретривер зотли ит ўйнаши керак эди, бироқ аввал ҳам сенбернерлар билан фильмда ишлаган мураббий Карл Льюис Миллер бу итларни яхши кўриб қолади ва сценарийни ўзгартиришни таклиф қилади. Натижада бу роль иқтидорли ит Крисга берилади. Афсуски, биринчи қисм суратга олингандан сўнг сенбернер Крис нафақага чиқади, кейинчалик у ёшлиги ўтган фермада 12 ёшида вафот этади. Бетховеннинг бошқа қисмларида худди шу зотли бошқа итлар ўйнаган.
Пингвинлар — “Жаноб Поппер пингвинлари”
Ҳайвонларни суратга олиш — осон иш эмас, лекин режиссёр Марк Уотерс фильмни компьютер графикасини камроқ ишлатган ҳолда суратга олишга қарор қилади. “Жаноб Поппер пингвинлари”да олтита суб-Антарктика пингвинлари тасвирланган. Пингвинлар нафақат томошабинларнинг, балки бутун суратга олиш гуруҳининг севимлисига айланади. Ишбилармон Поппер ролини ижро этган Жим Керри улар “кучукчалардан 10 баробар ёқимтойроқ” эканини айтади. Айтганча, Голливуддаги премьерада пингвинлар ҳам актёрлар билан биргаликда қизил гиламдан ўтган.
Изоҳ (0)