Таъмирлаш учун бюджетдан пул ажратилиши ўн йилдан буён кутиб турган мактаблар бор. Бу ҳақда 20 декабрь куни бўлиб ўтган Сенатнинг қирқ саккизинчи ялпи мажлисида сенатор Қутбиддин Бурхонов 2024 йилги Бюджетнома муҳокамасида айтиб ўтди.
Президентимизнинг нафақат маҳаллий кенгашларда, ҳатто маҳаллаларда ҳам аҳоли учун муҳим бўлган масалалар муҳокама қилиниб, таклифлар киритилишини таъкидлаган эдилар. Шу мақсадда биз Тошкент вилоятида ўрганиш қилдик. Натижада ўнга яқин тиббиёт муассасаси, 14 та мактаб ва мактабгача таълим муассасасида капитал таъмирлаш ёки реконструкция қилиш зарурати борлиги аниқланди.
Уларни таъмирлашга бюджетдан пул ажратиш учун ўн йил мобайнида таклиф бериляпти, бу йил ҳам шу таклиф берилган. Лекин ўн биринчи йилда ҳам Бюджетномага киритилмаган. Унда қайси мезонларга асосан киритилади ёки киритилмайди ва буни қанча кутиш керак?
Ҳаттоки мактаблар орасида 1956 йилда қурилган, яъни фойдаланилаётганига 70 йилга яқинлашиб қолганлари бор. Шу ерда ҳам сиз билан бизнинг фарзандларимиз, набираларимиз ўқишади, — деди сенатор.
Бунга бош вазир ўринбосари, иқтисодиёт ва молия вазири Жамшид Қўчқоров жавоб берди.
Тўғрисини айтганда, 1956 йилда қурилган мактаб, албатта, таъмирталаб бўлиши 100 фоиз. Нима учун буни Бюджетномага кирмагани бўйича иқтисодиёт ва молия вазири ўринбосари Адиз Бобоев шуғулланади. Эртага ўша туманни ва бошқа айтилган жойларни бориб кўрсак ва бу бўйича Сенатга ёзма ахборот берамиз.
Агар айтилган бинолар ҳақиқатан ҳам рўйхатга кирмай қолган бўлса, чорасини кўрамиз, — деди Жамшид Қўчқоров.
Аввалроқ сенаторлар кексалар, болали аёллар, ногиронлиги бўлган шахслар ерусти пиёда ўтиш кўприкларидан фойдаланганида қийналаётганини танқид қилганди.
Изоҳ (0)