Ўзбекистонда дарахтларни ноқонуний кесганлик учун жавобгарликни ошириш кўзда тутилган қонун 20 декабрь куни бўлиб ўтган ялпи мажлисда сенаторлар томонидан маъқулланди.
Таклиф этилаётган қонун билан Маъмурий жавобгарлик тўғрисидаги кодексга бир қатор ўзгариш ва қўшимчалар киритилмоқда.
Жумладан, дарахтларни, буталарни ва ниҳолларни қонунга хилоф равишда кесиш, шикастлантириш ёки бошқа жойга кўчириш учун белгиланган жарима миқдори 5 баробарга оширилмоқда.
Бунда ушбу ҳуқуқбузарлик учун жарима:
- фуқароларга БҲМнинг 25 бараваридан 50 бараваригача — 8,5 миллион сўмдан 17 миллион сўмгача (амалда 5 бараваридан 10 бараваригача)
- мансабдорларга эса БҲМнинг 50 баробардан 75 баробаригача — 17 миллион сўмдан 25,5 миллион сўмгача белгиланмоқда (амалда 10 баравардан 15 бараваргача).
Ушбу ҳуқуқбузарлик жарима қўлланилганидан кейин 1 йил давомида такрор содир этилганда жарима миқдори фуқароларга БҲМнинг 50 баробаридан 75 баробаригача (17 миллиондан 25,5 миллионгача) мансабдор шахсларга эса 75 баробаридан 100 баробаригача (25,5 миллиондан 34 миллионгача) ошириш ёки ҳуқуқбузарга нисбатан 15 суткагача бўлган муддатда маъмурий қамоққа олиш жазо чораси назарда тутилмоқда.
Шунингдек, дарахт ва буталарнинг қимматбаҳо турларини кесиш ёки йўқ қилишга олиб келадиган лойиҳа ҳужжатларини тайёрлаганлик учун мансабдор шахсларга БҲМнинг 50 баробаридан 75 баробаригача миқдорда жарима шаклидаги маъмурий жавобгарлик киритилмоқда.
Дарахт ва буталар қимматбаҳо навлари кесилишига ёки йўқ қилишга олиб келадиган лойиҳа ҳужжатларини тайёрлаганлик учун мансабдорларга БҲМнинг 50 бараваридан 75 бараваригача миқдорда жарима шаклидаги маъмурий жавобгарлик киритилмоқда.
Қонун билан “Ўсимлик дунёсини муҳофаза қилиш ва ундан фойдаланиш тўғрисида”ги қонунга ҳам қўшимчалар ва ўзгартиришлар киритилмоқда.
Хусусан, давлат ўрмон фондига кирмайдиган дарахтлар ва буталар қимматбаҳо навларини ғайриқонуний равишда кесганлик, йўқ қилганлик учун юридик шахсларга нисбатан БҲМнинг 100 бараваридан 300 бараваригача миқдорда молиявий санкциялар қўлланилиши белгиланмоқда. Бу ҳозирги ҳисоб-китобда 34 миллион сўмдан 102 миллион сўмгача бўлган суммани ташкил этади.
Бунда Экология, атроф-муҳитни муҳофаза қилиш ва иқлим ўзгариши вазирлиги жарима тарзида молиявий санкция қўллаш тўғрисида қарор қабул қилиши кўрсатиб ўтилмоқда.
Ундан ташқари, давлат ўрмон фондига кирмайдиган дарахтлар ва буталарнинг қимматбаҳо навлари ғайриқонуний равишда кесилган ёки йўқ қилинган тақдирда, ушбу ҳуқуқбузарликни содир этган шахс ҳар бир дарахт ва бута ўрнига қимматбаҳолиги жиҳатидан кам бўлмаган 100 туп дарахт ва бута кўчатини айнан ўша жойга ўз ҳисобидан экиши ҳамда уларни 3 йил давомида парвариш қилиши шартлиги белгиланмоқда.
“Мамлакатимизнинг қайси бир ерида бўлмасин, бирорта дарахт ноқонуний кесилгудек бўлса, биринчи навбатда, жамоатчилик (ОАВ, ижтимоий тармоқлар) шу заҳотиёқ хабар топиб, бонг урмоқда. Ва зудлик билан таъсир чоралари кўрилмоқда. Лекин шунга қарамасдан, масала ҳамон долзарб. Дарахтларни нобуд қилиш оғир оқибатларга олиб келишини ҳаммаям чуқур англаб етаётгани йўқ”, — деди мажлисда Танзила Норбоева.
Сенат раисининг таъкидлашича, мазкур қонун асосида киритилаётган нормалар дарахтларни ноқонуний кесганлик учун жавобгарлик янада кучайтирилмоқда. Нафақат оқибатлар, балки уларга олиб келувчи омилларнинг ҳам олдини олиш имконияти яратилмоқда.
Август ойида президент парламент томонидан қабул қилиниб, Сенат томонидан маъқулланган дарахтларни ноқонуний кесганлик учун жарималарни ошириш кўзда тутилган қонунни рад этганди.
Изоҳ (0)