Ta’mirlash uchun budjetdan pul ajratilishi o‘n yildan buyon kutib turgan maktablar bor. Bu haqda 20-dekabr kuni bo‘lib o‘tgan Senatning qirq sakkizinchi yalpi majlisida senator Qutbiddin Burxonov 2024-yilgi Budjetnoma muhokamasida aytib o‘tdi.
Prezidentimizning nafaqat mahalliy kengashlarda, hatto mahallalarda ham aholi uchun muhim bo‘lgan masalalar muhokama qilinib, takliflar kiritilishini ta’kidlagan edilar. Shu maqsadda biz Toshkent viloyatida o‘rganish qildik. Natijada o‘nga yaqin tibbiyot muassasasi, 14 ta maktab va maktabgacha ta’lim muassasasida kapital ta’mirlash yoki rekonstruksiya qilish zarurati borligi aniqlandi.
Ularni ta’mirlashga budjetdan pul ajratish uchun o‘n yil mobaynida taklif berilyapti, bu yil ham shu taklif berilgan. Lekin o‘n birinchi yilda ham Budjetnomaga kiritilmagan. Unda qaysi mezonlarga asosan kiritiladi yoki kiritilmaydi va buni qancha kutish kerak?
Hattoki maktablar orasida 1956-yilda qurilgan, ya’ni foydalanilayotganiga 70 yilga yaqinlashib qolganlari bor. Shu yerda ham siz bilan bizning farzandlarimiz, nabiralarimiz o‘qishadi, — dedi senator.
Bunga bosh vazir o‘rinbosari, iqtisodiyot va moliya vaziri Jamshid Qo‘chqorov javob berdi.
To‘g‘risini aytganda, 1956-yilda qurilgan maktab, albatta, ta’mirtalab bo‘lishi 100 foiz. Nima uchun buni Budjetnomaga kirmagani bo‘yicha iqtisodiyot va moliya vaziri o‘rinbosari Adiz Boboyev shug‘ullanadi. Ertaga o‘sha tumanni va boshqa aytilgan joylarni borib ko‘rsak va bu bo‘yicha Senatga yozma axborot beramiz.
Agar aytilgan binolar haqiqatan ham ro‘yxatga kirmay qolgan bo‘lsa, chorasini ko‘ramiz, — dedi Jamshid Qo‘chqorov.
Avvalroq senatorlar keksalar, bolali ayollar, nogironligi bo‘lgan shaxslar yerusti piyoda o‘tish ko‘priklaridan foydalanganida qiynalayotganini tanqid qilgandi.
Izoh (0)