Бугун, 20-декбар куни бўлиб ўтган Олий Мажлис Сенатининг қирқ саккизинчи ялпи мажлисида 2024 йил бюджетида хусусий секторда ишловчи аёлларнинг ҳомиладорлик ва туғиш нафақалари (декрет) миқдори қисқартирилиши муҳокама қилинди.
Бу қисқартириш реал ҳисоб-китоблар, яъни жорий йилги ўзлаштириш даражасини инобатга олган ҳолда белгиланган. Лекин токи бюджет лойиҳаси эълон қилингунга қадар хусусий секторда ишловчи аёлларнинг декрет пули билан боғлиқ реал ҳолат тегишли идоралар томонидан жамоатчиликка тақдим этилганини эслай олмаймиз. Масалан, Оила ва хотин-қизлар қўмитаси ушбу масала билан қизиқмаган.
Нега ўзлаштириш кам бўляпти, хусусий сектордаги аёлларимиз давлатнинг бу кафолатидан қанчалик хабардор, хусусий корхоналар бу масалага қандай ёндашяпти, деган саволлар берилиши ва мана шу саволлар доирасида муҳокамалар бўлиб ўтиши керак эди. Лекин бу жараён бўлгани йўқ. Фақат йилнинг охирида, кейинги йилги бюджет эълон қилинганида саволлар келиб тушмоқда. Ваҳоланки, мутасадди вазирлик, идоралар бунга биринчи навбатда эътибор қаратишлари керак эди, — деди Танзила Норбоева.
Сенат раисининг таъкидлашича, ҳомиладорлик ва туғиш нафақаларидан аёлларнинг фойдаланмаётгани мутасадди ташкилотларнинг бунга қизиқмаётгани, масалани давлат идоралари олдига қўймаётгани ва хусусий корхоналар билан ишланмаётганини кўрсатади.
Хусусий секторда расман ишлаётган аёлларимиз билиб қўйишлари керак, ҳомиладорлик ва туғиш нафақалари бу — давлат кафолати ва ҳар қандай ҳолатда ҳам тўлаб берилади. Бошқача талқинга ўрин йўқ. Бўлиши ҳам мумкин эмас, — деди Танзила Норбоева.
Аввалроқ Танзила Норбоева кексалар, болали аёллар, ногиронлиги бўлган шахслар ерусти пиёда ўтиш кўприкларидан фойдаланганда қийналаётгани, бундан норози эканлигини айтиб ўтган эди.
Изоҳ (0)