Ўзбекистонда яширин иқтисодиёт улуши мамлакат ялпи ички маҳсулотининг 45 фоизигача етиши мумкин. Бу ҳақда бош вазир ўринбосари, иқтисодиёт ва молия вазири Жамшид Қўчқоров Сенатда ўтказилаётган мажлисда маълум қилди.
Жамшид Қўчқоровнинг айтишича, бир неча соҳаларда яширин иқтисодиёт улуши анча юқори.
“Яширин иқтисодиётга қарши курашиш бўйича қаттиқ ишлашимиз керак. Унинг кўламини расмий иқтисодиётга таққослаб оладиган бўлсак, айрим баҳоларга кўра 25–45 фоизни ташкил этиши мумкин. Бу жуда ҳам юқори кўрсаткич. Яширин иқтисодиёт улуши қурилиш, савдо ва хизмат кўрсатиш соҳаларида юқори. Бу муаммога қарши курашиш борасида Президент администрацияси билан биргаликда президент қарори лойиҳасини тайёрлаяпмиз. Ҳужжат якунига етмоқда. Унда кўп чоралар акс этади. Хусусан, нақд пул айланмасини камайтириш масаласи ҳам бор”— деди вазир.
Аввалроқ Макроиқтисодий ва ҳудудий тадқиқотлар институти (МҲТИ) республикада яширин иқтисодиёт улуши ялпи ички маҳсулотнинг 40 фоизидан 60 фоизигача етишини таҳлил қилганди.
Изоҳ (0)