O‘zbekistonning 2024-yilgi soliq-budjet siyosatida energetik hamda tarkibida shakar bo‘lgan gazli ichimliklarga aksiz solig‘i belgilash nazarda tutilmoqda. Bu haqda bosh vazir o‘rinbosari, iqtisodiyot va moliya vaziri Jamshid Qo‘chqorov Senatning navbatdagi yalpi majlisida maʼlum qildi.
Jamshid Qo‘chqorovning aytishicha, bunday ichimliklar uchun soliq solinishi sog‘lom turmush tarzi va tabiatni asrashni targ‘ib qilish maqsadida joriy etiladi.
“Kelgusi yilda asosiy soliq turlari bo‘yicha soliq stavkalari o‘zgartirishsiz qoldirilmoqda. Ayrim kichik o‘zgarishlar bor. Jumladan, sog‘lom turmush tarzi va tabiatni asrash borasida bir qator takliflar kiritilgan. Xususan, 2024-yil 1-apreldan tarkibida shakar mavjud bo‘lgan gazlangan ichimliklarning 1 litri uchun 500 so‘mdan, energetik ichimliklarning 1 litri uchun 2 000 so‘m miqdorida aksiz solig‘i joriy etilmoqda”, — dedi vazir.
Qo‘shimcha qilinishicha, kelasi yil 1-iyuldan boshlab avtmobil shinalaridan 1 donasi uchun (vaznidan kelib chiqqan holda) bazaviy hisoblash miqdorining 0,3 foizi miqdorida utilizatsiya yig‘imi joriy etiladi. Shu bilan birga, 2024-yil 1-yanvardan sigaretalar importiga aksiz solig‘i 5 foizga pasaytiriladi.
Avvalroq iqtisodiyot va moliya vaziri o‘rinbosari Ahadbek Haydarov 2024-yil uchun begilanayotgan asosiy soliq stavkalari haqida batafsil maʼlumot bergandi.
Izoh (0)