Украина қўшинларининг “Таврия” оператив-стратегик гуруҳи қўмондони Александр Тарнавский Reuters агентлигига берган интервьюсида Украина Қуролли кучлари артиллерия ўқлари етишмаслиги сабабли айрим операцияларни тўхтатишга мажбур бўлганини айтди.
“Ўқ-дорилар, айниқса посцовет снарядлари билан боғлиқ муаммо бор — булар 122 мм, 152 миллиметрли снарядлар. Бугунги кунда бу муаммолар бутун фронт чизиғида мавжуд. Биздаги снарядлар эҳтиёжларимизни ҳисобга олган ҳолда етарли эмас, шунинг учун биз уларни қайта тақсимлаяпмиз”, — деди Тарнавский.
Унинг қайд этишича, Украина армияси Россия билан 22 ойлик ҳарбий можародан сўнг Ғарб давлатларининг ҳарбий ёрдамига жиддий боғлиқлигича қолмоқда.
14 декабрь куни АҚШ Сенати аъзоси Чак Шумер сенаторларнинг таътилларини кейинга қолдириш ва Украинага қўшимча ёрдам бериш бўйича келишиш устида ишлашни давом эттириш қарорини эълон қилди. Америка президенти Жо Байден Украинани молиялаштириш учун 61,4 миллиард доллар сарфлашни таклиф қилди.
15 декабрь куни ЕИ давлатлари Венгриянинг қаршилиги туфайли Украинага 50 миллиард евро миқдорида ёрдам бериш бўйича келиша олмади. Венгрия бош вазири Виктор Орбаннинг сўзларига кўра, Европа Иттифоқи давлатлари бу масалага фақат кейинги йил қайтиши мумкин.
Изоҳ (0)