Россия ИИВ Украина ҳарбий разведкаси раҳбари Кирилл Будановни қидирувга берди

Россия Ички ишлар вазирлиги Украина Мудофаа вазирлиги Бош разведка бошқармаси бошлиғи Кирилл Будановга нисбатан қидирув эълон қилди. Тегишли маълумотлар вазирликнинг маълумотлар базасида пайдо бўлди, деб хабар бермоқда Meduza.

Будановнинг карточкасида, одатдагидек, у қайси жиноят иши бўйича қидирувга берилгани кўрсатилмаган.

Россия Тергов қўмитаси октябрь ойи бошида Украинанинг тўрт нафар ҳарбий раҳбари, жумладан, Кирилл Будановни теракт содир этганликда айблаган эди. Тергов қўмитаси уларни Россиядаги нишонларга қилинган дронлар ҳужумида иштирок этган, деб ҳисоблайди.

Россия Тергов қўмитаси кўплаб украиналик амалдорлар, тадбиркорлар ва ҳарбий хизматчиларга қарши жиноий иш очган. Россия судлари бундай ишлар бўйича айбланувчиларни сиртдан ҳибсга олади ва қидирувга беради.

Украина ҳуқуқ-тартибот идоралари, ўз навбатида, босқин пайтида содир этилган жиноятларга алоқадор бўлган Россия расмийлари ва ҳарбий хизматчиларига қарши ишларни тергов қилмоқда.

Аввалроқ Украина разведка хизмати ходимлари, шунингдек, разведка бошлиғи Кирилл Будановнинг рафиқаси Марианна оғир металлар, жумладан, мишяк (маргимуш) ва симоб билан заҳарлангани ҳақида хабар берилганди.