Украина Мудофаа вазирлигининг Бош разведка бошқармаси (ГУР) раҳбари Кирилл Будановнинг рафиқаси Марианна оғир металлдан заҳарланиш ташхиси билан касалхонага ётқизилди. Бу ҳақда 28 ноябрь, сешанба куни “Бабел” нашри исми ошкор этилмаган суҳбатдошига таяниб хабар берди.
“Бу моддалар кундалик ҳаётда ёки ҳарбий ишларда ҳеч қандай тарзда ишлатилмайди. Уларнинг мавжудлиги маълум бир одамни қасддан заҳарлашга уринишдан далолат бериши мумкин”, — дейди нашр манбаси, аёлнинг организмида қандай моддалар топилганига аниқлик киритмасдан.
Нашр суҳбатдошларига кўра, Марианна Буданова “узоқ вақт давомида соғлиғи ёмонлашганидан кейин” касалхонага ётқизилган. У даволаниш курсини тугатмоқда ва кузатув остида бўлади, деб ёзди “Бабел”. Нашр маълумотларига кўра, одам ўлдиришга уриниш бўйича тергов ҳаракатлари олиб борилмоқда.
Буданованинг касалхонага ётқизилгани ёки тергов бошлангани ҳақида расмий маълумот йўқ.
“Украинская правда”: Яна бир қанча ходимларда заҳарланиш аниқланди
Марианна Буданованинг заҳарланиши ҳақида “Украинская правда” нашри манбалари ҳам гапирди. Уларнинг сўзларига кўра, ГУР бошлиғининг рафиқаси “катта эҳтимол билан овқат орқали заҳарланган”.
“У ўзини ёмон ҳис қилаётганидан шикоят қилди, шунинг учун улар заҳарланишни аниқлайдиган тестларни ўтказишди”, — деб тушунтирди нашр суҳбатдоши.
Манбага кўра, “яна бир неча ходимда” заҳарланиш тасдиқланган. “Украинская правда” гап ГУР ходимлари ҳақида кетяптими ёки бошқалар, аниқлик киритмади.
“Будановнинг рафиқаси кичкина ва вазни енгил бўлгани учун заҳарланиш унда тезроқ намоён бўлди. Яна бир қанча ходимларда заҳарланиш аниқланди. Улар оғирроқ вазнли бўлгани сабаб ўзларида ҳеч нарсани сезмаган, ҳозир улар ҳам даволанмоқда”, — деди манба нашрга.
Айни пайтда, ГУР матбуот хизмати ОАВга Марианна Буданованинг заҳарланиши ҳақидаги маълумотни на тасдиқлади, на инкор қилди.
Жорий йилнинг июнь ойида ГУР вакили Андрей Юсов Россиянинг Украинага қарши уруши бошланганидан бери разведка бошлиғи Кирилл Будановнинг ҳаётига “ўндан ортиқ” суиқасд қилинганини айтганди.
Изоҳ (0)