Украина қарши ҳужумининг асосий қисми пиёда амалга оширилмоқда. Бу ҳақда Украина Мудофаа вазирлигининг Бош разведка бошқармаси (ГУР) раҳбари Кирилл Буданов Тҳе Wалл Стреет Journal газетасига берган изоҳида айтди.
“Афсуски, ҳужумларимизнинг аксарияти ҳозир пиёда олиб борилмоқда”, — деди у.
Будановнинг сўзларига кўра, оғир зирҳли техникадан фойдаланиш даражаси минимал.
Аввалроқ ГУР раҳбари Украина совуқ ҳаво, намлик ва лойгарчилик бошланганидан кейин ҳам, бу билан боғлиқ қийинчиликларга қарамай, қарши ҳужумни давом эттиришини маълум қилганди. У қарши ҳужум турли йўналишларда ва кутилганидан секинроқ давом этаётганини тан олди ҳамда вазиятни мураккаб деб баҳолади.
Украинанинг қарши ҳужуми июнь ойида бошланган. Шундан сўнг, Киев бир неча бор ҳужум секин кечаётганини билдирди. Бунинг сабаблари орасида Украина расмийлари қурол-яроғ етишмаслиги, жанг майдонидаги қийинчиликлар ва мустаҳкамланган Россия мудофаа чизиғини келтирган.
18-сентябр куни Зеленский CBS телеканали билан интервьюсида Украинанинг қарши ҳужуми суръатига изоҳ берди.
“Бу қийин вазият, сизга очиқ гапираман. Биздаги ташаббуснинг ўзи плюс. Бу жуда муҳим. Рус босқинчиларининг юришини тўхтатиб, ҳужумга ўтилди. Шунга қарамай, ҳаракат унчалик тез эмас. Аммо биз учун ҳар куни олдинга силжиётганимиз муҳим”, — деди у.
Украина президентининг таъкидлашича, украин қўшинлари ҳатто юз метр бўлса ҳам, имкон қадар олдинга силжиши керак.
“Путиннинг тин олишига йўл қўймаслигимиз керак”, — деди Зеленский.
У, шунингдек, Украина Қуролли кучларининг ҳужуми об-ҳавога боғлиқ эмаслигига ишонтирди: ҳозирда баъзи Ғарб таҳлилчилари яқин орада кузги лойгарчилик бошланиши ҳақида хавотир билан огоҳлантирмоқда.
Изоҳ (0)