АҚШ Сенати аъзоларининг аксарияти мамлакатнинг 2024-молия йили учун рекорд миқдорда — 886,3 миллиард долларлик мудофаа бюджети лойиҳасини қўллаб-қувватлади, деб хабар бермоқда Reuters.
Агентликнинг таъкидлашича, уни демократлар ҳам, республикачилар ҳам тортишувларсиз маъқуллаган. Қонун лойиҳаси 3,1 минг саҳифадан иборат бўлиб, мудофаага 886,3 миллиард доллар ажратилишини кўзда тутади, бу ўтган молия йилига нисбатан 3 фоизга кўп. 100 нафар сенатордан 87 нафари ҳужжат учун овоз берди, 13 нафари қарши чиқди.
“Муросага келиш” деб номланган лойиҳа, жумладан, қуйидагиларни ўз ичига олади:
- ҳарбий хизматчиларнинг иш ҳақини 5,2 фоизга ошириш;
- бир қатор компаниялардан аккумуляторлар сотиб олишни тақиқлаш, чунки иккала партия ҳам “хавфсизликка потенциал таҳдидлар ҳақида огоҳлантирган”;
- минтақада “мудофаа қобилиятини яхшилаш” ва Хитой билан тинч муносабатларни ривожлантириш учун АҚШ—Тайван ҳамкорлигини мустаҳкамлаш.
Ҳужжат Вакиллар палатасига кўриб чиқиш учун юборилади ва тасдиқлангач, якуний лойиҳа АҚШ президенти Жо Байден томонидан имзоланади.
Сентябрь ойи охиридан бери АҚШ Конгресси Украина ва Вашингтоннинг бошқа хорижий иттифоқчиларига ёрдам бериш учун маблағ ажратиш бўйича келиша олмаяпти. Байден ва демократлар бир қанча давлатларга, жумладан, Украина ва Исроилга 106 миллиард доллар ажратиш зарурлигини таъкидламоқда, республикачилар эса алоҳида қўллаб-қувватлашни талаб қилмоқда. Оқ уй қўшимча маблағ ажратилмса, Украина учун пул 2023 йил охиригача тугаши ҳақида огоҳлантирган.
Изоҳ (0)