Украина Мудофаа вазирлиги Разведка бош бошқармаси бошлиғи Кирилл Буданов ўзининг яралангани ёки ўлгани ҳақида Россия ОАВларида тарқалган миш-мишларга изоҳ берди. Ҳарбийнинг баёнотини Kyiv Post нашри чоп этди.
“Ҳозир Украинада ўлмас қўмондонларнинг махсус отряди шакллантирилмоқда — Валерий Залужний, мен, Степан Бандера, Симон Петлюра, Иван Мазепа. Шунинг учун, руслар ва уларнинг пропогандачилари ҳали кўп асабий, истерик муҳитда ишлашига тўғри келади. Тунлари ўлмас отряд Украинани босиб олишга интилаётган русларнинг тушига кириб, уларни даҳшатга солади”, — деди Буданов.
15 июнь куни Россия давлат агентлиги “РИА Новости” Кирилл Буданов 29 май куни Киевдаги Разведка бош бошқармаси (ГУР) биносига Россия томонидан берилган зарбадан сўнг оғир яралангани ҳақида хабар берди. Агентликнинг Россия ҳуқуқ-тартибот идораларидаги манбаси Украина разведкасидаги манбага таяниб, ракета Буданов ёнидаги офисга тушганини даъво қилди. Шундан сўнг Буданов вертолётда Польшадаги ҳарбий базага, у ердан эса Берлиндаги касалхонага эвакуация қилингани айтилди.
29 май куни, яъни Буданов “яраланган” куни ГУР Telegram-каналида разведка раҳбари Украинага ракета ҳужуми учун Россиядан қасос олишга ваъда берган видео чоп этилди. 11 июнь куни ГУР каналида разведка бошлиғининг яна бир видеоси пайдо бўлди, унда Буданов камерага жим қараб туради. “Режалар сукунатни яхши кўради”, — дейилади видео остидаги ёзувда.
“РИА Новости”, шунингдек, 24 май куни Украина Қуролли кучлари Бош қўмондони Валерий Залужний гўёки Россия ракетасининг ҳужуми оқибатида бошидан жароҳат олгани, унга ракета парчалари теккани, ортиқ ўз ишини бажара олмаслиги ҳақида ёзди. Киевда бу маълумот рад этилди. Украиналик зобит ва блогер Анатолий Штефан Валерий Залужний иштирокидаги видеони жойлаштирди ва у 25 май куни суратга олинганини айтди.
Изоҳ (0)