Тошкент ҳайвонот боғида 2022 йилнинг январь ойида уч ёшли қизалоқ онаси томонидан айиқ қафасига ташланган, қизча бахтли тасодиф сабаб йиртқичдан зарар кўрмай қолган. Қизалоқнинг онаси 1991 йилда туғилган Зилола Тўлаганова Тошкентдаги олий ўқув юртларидан бирида ўқитувчи бўлиб ишлаши, турмуш ўртоғи Россияга кетгани ва улар бирга яшамаётгани айтилган. Аёл руҳий асаб касалликлари диспансерида рўйхатда туриши маълум бўлган. Суд ажрими билан она ижтимоий хавфли хатти-ҳаракатини ақли норасо ҳолатда содир этган, деб топилиб, унинг Республика кузатуви кучайтирилган руҳий касалликлари шифохонасида мажбурий даволаниши белгиланган.
Бугун, 13 декабрь куни Тошкент шаҳрида Зилола Тўлаганованинг “Мени эшитинг” номли кўргазмаси ташкил этилган. Бу ҳақда “Миллий тикланиш” демократик партияси ахборот хизмати хабар бермоқда.
Кўргазмада Зилола Тўлаганованинг турли йилларда чизган 30 дан зиёд ижодий ишлари, у бадиий муҳаррирлик қилган 100 дан ортиқ китоблар, ҳаёти ва ижодига оид фотосуратлар ҳамда айни пайтда шифохонада яратган асарлари намойиш этилган.
Партия марказий кенгаш раиси ўринбосари Феруза Муҳаммаджонованинг айтишича, кўргазмани ташкил этишдан кўзланган асосий мақсад айни пайтда оғир руҳий ҳолатни бошидан кечираётган рассом аёлни қўллаб-қувватлаш, ижодини кенг тарғиб қилиш, иқтидорини юзага чиқариш, таниқли санъатшунослар, рассомлар, ноширлар, психологлар фикрлари асосида Зилола Тўлаганова ҳақида ижобий фикр уйғотишдир.
“Бундай фожиали ҳолатларнинг олдини олиш учун уларнинг оқибатлари билан эмас, инсонни ўзини бошқара олмайдиган ҳолатга олиб келган сабаблар билан курашиш муҳим эканини яна бир бор жамоатчиликка англатмоқчимиз”, – деди Феруза Муҳаммаджонова.
Нима бўлган эди?
28 январь куни соат 12:00 ларда ёш аёл номаълум сабабларга кўра одамларнинг кўз олдида кичкина қизалоқни айиқ қафасига ташлаб юборган.
“Зузу лақабли Кавказ қўнғир айиғи ўз волерида ётиб олиб, қизалоқни металл тўсиқ устидан отиб юборган аёл ҳаракатларини кузатди. Меҳмонларимиз ва ходимларимизнинг уринишларига қарамасдан, аёлни тўхтатиб қолишнинг имкони бўлмади. У болани йиртқичнинг қафасига отиб юборди. Зузу айиғимиз секингина зовурга тушиб, қизалоқни ҳидлаб кўрди ва ундан узоқлашди”, — дейилади хабарда.
Ҳолат ўрганилиб, кичкина қизалоқни айиқ волерига ташлаб юборган аёлга нисбатан жиноят иши қўзғатилди.
Кейинроқ ССВ йиртқич қафасига ташлаб юборилган қизчанинг аҳволи тўғрисида маълумот берди. Унда айтилишича, 2018 йилда туғилган қизчага дастлаб ҳайвонот боғи ҳамшираси биринчи ёрдам кўрсатган. Шундан сўнг у тез ёрдам машинасида соат 13:30 ларда Республика шошилинч тиббий ёрдам илмий марказига олиб келинган. Қизча шифохонада барча зарур тиббий кўриклардан зудлик билан ўтказилган.
“У енгил шок ҳолатида бўлган, баландликдан йиқилиш оқибатида очиқ бош мия жароҳати ва бош мия чайқалиши кузатилган. Ҳозирда унинг аҳволи яхши, тиббиёт ходимлари назоратида”, — дейилади хабарда.
Тошкент ҳайвонот боғи Йиртқичлар бўлими мудири Нодир Баҳромов боғда 28 январь куни содир бўлган воқеа юзасидан “Дарё”га қўшимча маълумотлар тақдим этди. Ходимнинг таъкидлашича, бу ҳолат боғ тарихидаги биринчиси.
“Ўзи эркак айиқ бу. Аслида эркак айиқ ҳатто ўзининг болалари учраганда еб қўйиб, ўлдирадиган даражада бўлади. Лекин Аллоҳнинг марҳамати деймизми, ҳатто боши қонаган ҳолатда ҳам айиқ қизчага тегмади. Бу ердаги ходимлар тез нон ва шунга ўхшаш егуликлар билан айиқни чалғитиб, узоқлаштирди”, — дейди Нодир Баҳромов.
Маҳалла ва оилани қўллаб-қувватлаш вазирлиги қизини айиқ қафасига ташлаб юборган аёл ҳақида маълумот берди. Ўрганишлар давомида ҳодиса иштирокчилари 1991 йилда туғилган фуқаро З.Т. ва унинг 2018 йилда туғилган қизи З.А. экани аниқланган. З.Т. исмли аёл ҳозирга қадар ўз отаси, фуқаро Й.Т.га тегишли хонадонда 2 нафар фарзанди билан яшаб келган. Аёл билан суҳбат давомида унинг Тошкентдаги олий ўқув юртларидан бирида ўқитувчи бўлиб ишлаши, айни вақтда Россия давлатига кетган турмуш ўртоғи Н.К. билан ҳозирда бирга яшамаётгани сабабли руҳий тушкунликка тушиб қолгани маълум бўлган.
Ижтимоий тармоқларда эса Тошкент ҳайвонот боғида аёл кичкина қизалоқни айиқ қафасига ташлаб юборгани акс этган видеолавҳа тарқалди.
Кейинчалик айиқ қафасидан олиб чиқилган қизалоқ 18 ёшга тўлгунча Болалар миллий тиббиёт марказининг доимий назоратида бўлиши хабар қилинди. Айиқ қафасидан омон қолган қиз шифохонадан уйига қайтган.
Изоҳ (0)