Тошкент ҳайвонот боғида 28 январь куни аёл кичкина қизалоқни айиқ қафасига ташлаб юборгани ҳақида хабар берилганди. Олий суд матбуот котиби ҳолат юзасидан қўзғатилган жиноят иши бўйича маълумот берди.
Қайд этилишича, 18 апрель куни жиноят ишлари бўйича Юнусобод туман судида Жиноят кодексининг 25,97-моддаси 2-қисми «в» бандида назарда тутилган жиноятни содир этганликда айбланган З.Т. (1991 йилда Тошкент шаҳрида туғилган)га тиббий йўсиндаги мажбурлов эҳтиёт чорасини қўллаш масаласини ҳал қилишга оид жиноят ишини кўриб чиқиш бўйича суд жараёни ўз ниҳоясига етган.
Эълон қилинган суд ажрими билан З.Т. ижтимоий хавфли хатти-ҳаракатини ақли норасо ҳолатда содир этган, деб топилиб, унинг Республика кузатуви кучайтирилган руҳий касалликлари шифохонасида мажбурий даволаниши белгиланган.
«Ушбу ажримдан норози томонлар 20 сутка муддат ичида шу суд орқали Тошкент шаҳар судига хусусий шикоят ёки хусусий протест келтиришга ҳақли», — дейилади хабарда.
Эслатиб ўтамиз, 28 январь куни соат 12:00 ларда ёш аёл номаълум сабабларга кўра одамларнинг кўз олдида кичкина қизалоқни айиқ қафасига ташлаб юборган. Ҳолат ўрганилиб, кичкина қизалоқни айиқ волерига ташлаб юборган аёлга нисбатан жиноят иши қўзғатилганди.
Кейинроқ ССВ йиртқич қафасига ташлаб юборилган қизчанинг аҳволи тўғрисида маълумот берди. Унда айтилишича, 2018 йилда туғилган қизчага дастлаб ҳайвонот боғи ҳамшираси биринчи ёрдам кўрсатган. Шундан сўнг у тез ёрдам машинасида соат 13:30 ларда Республика шошилинч тиббий ёрдам илмий марказига олиб келинган. Қизча шифохонада барча зарур тиббий кўриклардан зудлик билан ўтказилган.
Маҳалла ва оилани қўллаб-қувватлаш вазирлиги қизини айиқ қафасига ташлаб юборган аёл ҳақида маълумот берган. Ўрганишлар давомида ҳодиса иштирокчилари 1991 йилда туғилган фуқаро З.Т. ва унинг 2018 йилда туғилган қизи З.А. экани аниқланган. З.Т. исмли аёл ҳозирга қадар ўз отаси, фуқаро Й.Т.га тегишли хонадонда 2 нафар фарзанди билан яшаб келган. Аёл билан суҳбат давомида унинг Тошкентдаги олий ўқув юртларидан бирида ўқитувчи бўлиб ишлаши, айни вақтда Россия давлатига кетган турмуш ўртоғи Н.К. билан ҳозирда бирга яшамаётгани сабабли руҳий тушкунликка тушиб қолгани маълум бўлган.
Ижтимоий тармоқларда эса Тошкент ҳайвонот боғида аёл кичкина қизалоқни айиқ қафасига ташлаб юборгани акс этган видеолавҳа тарқалди.
Кейинчалик айиқ қафасидан олиб чиқилган қизалоқ 18 ёшга тўлгунча Болалар миллий тиббиёт марказининг доимий назоратида бўлиши хабар қилинди. 21 февраль куни қизалоқ республика шошилинч тиббий ёрдам илмий марказидан уйига қайтарилган.
Февраль бошида Бош прокуратура ушбу аёл 2021 йилнинг июль ойидан буён руҳий асаб касалликлари диспансерида рўйхатда тургани маълум қилганди. Март ойи сўнггида қизини айиқ қафасига ташлаб юборган аёл иши судга юборилган.
Мавзуга доир:
Изоҳ (0)