АҚШда кана орқали юқадиган ўта хавфли касаллик аниқланди

Америкалик шифокорлар одамларга канадан юқиши мумкин бўлган ўлимга олиб келувчи касаллик тарқалиши ҳақида огоҳлантирди. Бу ҳақда Тhе Washington Post хабар берди.

Касалликларни назорат қилиш ва олдини олиш марказлари (CDC) шифокорлар ва жамоатчиликни камдан кам учрайдиган, аммо ўлимга олиб келадиган, беш беморни касалхонага ётқизган ва улардан уч нафарини ўлдирган касалликнинг авж олиши ҳақида огоҳлантирди.

Rocky Mountain spotted fever— RMSF номли касаллик асосан итларда мавжуд касалланган кана чақиши орқали юқади. АҚШда бу камдан кам учрайди, аммо Мексика шимолида эпидемия даражасига чиққан, бу ерда сўнгги беш йил ичида 2000 дан ортиқ ҳолатлар, шунингдек, юзлаб ўлимлар қайд этилган.

CDC июль ойи охирида беш беморга ушбу касаллик ташхиси қўйилганини айтди. Уларнинг барчаси  Мексиканинг Теката шаҳрига икки ҳафта ичида ташриф буюрган. RMSF Мексиканинг шимолидаги кўплаб чегара штатларида, жумладан, Қуйи Калифорния, Сонора, Чиуауа, Коауила ва Нуэво-Леонда, шунингдек, АҚШнинг жануби-ғарбий қисмидаги ҳудудларда эндемикдир.

“Бу касаллик жуда хавфлидир, чунки юқтирганларнинг ярми касалликнинг дастлабки саккиз кунида вафот этади”, — деди Касалликларни назорат қилиш ва олдини олиш марказлари бош шифокори Кристофер Педдок.

Унинг таъкидлашича, касалликни фақат эрта босқичда аниқланган тақдирдагина даволаш мумкин.