АҚШ ҳукумати Исроилни Ғазо секторидаги ҳарбий операцияни Янги йилга қадар якунлаши зарурлиги ҳақида хабардор қилди, деб ёзади Тhe Economist ўз манбаларига таяниб.
Журналга кўра, Исроил мудофаа кучлари, катта эҳтимол билан, қуруқликдаги кучларга таянган ҳолда, ҳарбий кампанияни давом эттиради. Бундай сценарийда Фаластиннинг ҲАМАС ҳаракати Ғазонинг бир қисмини назорат қилишда давом этади, деб ёзади Тhе Economist.
Нашр суҳбатдошларига кўра, АҚШ расмийларининг позициясини давлат котиби Энтони Блинкен яқинда Исроилга қилган ташрифи чоғида билдирган.
Аммо ҳар икки мамлакат расмийлари АҚШ маъмурияти исроилликлар учун бирор-бир муддат белгилаганини рад этди.
Исроил ва ҲАМАС ўртасидаги уруш 7 октябрда бошланган. Исроил ҳукумати қурбонлар сонини 1,4 минг киши деб ҳисобласа, Фаластин ҳукумати 17 мингдан ортиқ инсон ҳалок бўлганини маълум қилди.
Ноябрь ойи охирида томонлар 7 кунлик ўт очишни тўхтатиш бўйича келишиб олдилар, бироқ 1 декабрь куни Исроил армияси Ғазодаги амалиётларини қайта бошлади.
8 декабрь куни АҚШ президенти Жо Байден Исроил бош вазири Биньямин Нетаньяху билан телефон орқали мулоқот қилиб, Ғарбий Соҳилда фаластинликларга нисбатан зўравонликлардан хавотирда эканини билдирди.
Изоҳ (0)