Шимолий Корея етакчиси Ким Чен Ин Maybach автомобилида ҳаракатлангани маълум бўлди. Энг қизиғи шундаки, ушбу автомобилни Шимолий Кореяга етказиб бериш санксиялар билан тақиқланган.
Жанубий Кореянинг SBС телерадиокомпанияси Ким Чен Иннинг автомобили ўзгарганига эътибор қаратди.
Телекомпания маълумотларига кўра, декабрь ойида Пхеньянда бўлиб ўтган миллий оналар қурултойидан олинган видеода Ким Чен Ин келган автомобиль орқа эшигининг орқа томонида Maybach белгиси, юкхонада эса S650 белгиси борлигини кўриш мумкин. Бу ерда гап 2019 йилда чиқарилган Benz Maybach ҳақида кетмоқда, деб хабар берди SBС.
Аниқлик киритилишича, Ким Чен Ин сентябрь ойида Россияга ташрифи чоғида эски машинадан фойдаланган. Шундан келиб чиқиб, SBС Шимолий Корея етакчиси автомобилни октябрь ёки ноябрда алмаштирган деган хулосага келади. Maybach машинаси КХДРда ҳашаматли автомобиль ҳисобланади, БМТ Хавфсизлик кенгаши қарори билан ушбу автомобилларни мамлакатга етказиб бериш тақиқланган.
Сентябрь ойида Шимолий Корея етакчиси Ким Чен Ин Россияга беш кунлик ташриф билан келган эди. Хусусан, у Россия президенти Владимир Путин билан учрашди, уларнинг музокаралари тўрт соатга яқин давом этди. Ким Чен Ин Россия билан муносабатларни мустаҳкамлаш ниятида эканини маълум қилган.
Изоҳ (0)