Будапешт Украинанинг Европа Иттифоқига қабул қилинишига қарши чиқади. Бу ҳақда Венгрия бош вазири Виктор Орбан Франциянинг Lе Point журналига берган интервьюсида айтиб ўтди.
“Украина дунёдаги энг коррупциялашган мамлакатлардан бири”, — деб таъкидлади Орбан ва бу унинг Европа Иттифоқига ҳозирча қабул қилина олмаслигига сабаблардан бири эканини таъкидлади.
Бундан ташқари, Орбаннинг фикрича, Киевнинг ҳамжамиятга аъзолиги масаласида иқтисодий ҳолат ҳам ҳисобга олиниши керак:
“Украина муҳим қишлоқ хўжалиги секторига эга йирик давлат. Агар ушбу қишлоқ хўжалиги тармоғининг Европа тизимига киришига рухсат берилса, у тизимни йўқ қилади”.
Бош вазир, шунингдек, Венгрия аҳолисининг тўртдан уч қисми Украинанинг Европа Иттифоқига қўшилиши бўйича музокаралар бошланишига қарши эканини таъкидлади.
Ушбу музокаралар ўрнига Орбан “стратегик шериклик” сиёсатини таклиф қилди.
“Агар аввал Украинанинг ЕИга яқинлашишига эришсак, бир неча йилдан кейин бу масалага қайтамиз”, — деди Венгрия ҳукумати раҳбари.
Орбан ЕИ саммитидаги муваффақиятсизлик билан таҳдид қилмоқда
Олдинроқ Орбан, агар Европа кенгаши раҳбари Шарл Мишел Украинанинг ЕИга кириши бўйича музокараларни бошлаш масаласини кун тартибидан олиб ташламаса, ЕИнинг декабрдаги саммити муваффақиятсиз якунланиши мумкинлигини айтганди. Музокаралар ўтказиш тўғрисидаги қарор Европа Иттифоқининг барча 27 давлати раҳбарлари томонидан бир овоздан қабул қилиниши керак.
Европа дипломатларига кўра, Орбаннинг Украинага нисбатан кескин позицияси Венгриянинг Еврокомиссия томонидан мамлакатдаги қонун устуворлиги билан боғлиқ муаммолар туфайли блокланган кўп миллиардлик субсидиялар тўланишини таъминлаш учун ЕИга босимни кучайтириш истаги билан изоҳланади.
Изоҳ (0)