Ҳокимиятни тортиб олишга уриниш бўйича АҚШ собиқ президенти Дональд Трамп устидан суд жараёни 2024 йил 4 мартда бошланади. Бу ҳақда CNN хабар бермоқда.
Трампнинг адвокатлари тингловларни 2026 йилга қолдиришни сўраган, прокуратура эса уларни эртароқ, 2024 йил январида бошлашни талаб қилган.
Жараёнда қатнашадиган ҳакамлар ҳайъати суд муҳокамасининг биринчи кунида танланади.
Америка оммавий ахборот воситаларининг қайд қилишича, илк суд мажлиси АҚШ Республикачилар партияси учун муҳим воқеадан бир кун олдин бўлиб ўтади: 5 март куни бир қатор штатларда президентлик праймеризлари ўтказилади.
Махсус прокурор Жек Смит Трампнинг 2020 йилги президентлик сайловида мағлубиятга учраганидан сўнг, ҳокимиятда қолиш учун қилган хатти-ҳаракатларини тергов қилмоқда. Хусусан, гап Трампнинг 2021 йил 6 январдаги нутқи ҳақида бормоқда, у сайлов сохталаштирилгани ҳақидаги баёнотларини бир неча бор такрорлаган. Шундан сўнг, унинг тарафдорлари Капитолийга бостириб киришган.
Сўнгги ойларда Трампга жами тўртта жиноий иш бўйича айблов эълон қилинди. Булар — намойишчиларнинг Капитолийга бостириб кириши, махфий ҳужжатларнинг ноқонуний сақланиши, сайловга аралашиш, шунингдек, собиқ давлат раҳбарининг бизнеси билан боғлиқ қонунбузарликлар. Трамп барча айбловларни рад этмоқда.
Сайловга аралашиш иши бўйича 24 август куни расман полицияга таслим бўлган Трамп 200 минг доллар гаров эвазига қўйиб юборилди.
Изоҳ (0)