АҚШ округ судьяси Таня Чуткан 45-президент Дональд Трампнинг 2021 йил 6 январда Капитолийга босқин учун жиноий таъқибни бекор қилиш ҳақидаги иккита илтимосини рад этди, деб хабар бермоқда Reuters.
2020 йилги сайловда мағлуб бўлганидан кейин ҳокимиятни сақлаб қолишга уринишда айбланган Трамп президентлик дахлсизлигидан келиб чиқиб, ишни тугатишни сўраган. Иккинчи сўровида у АҚШ конституциясидаги сўз ва йиғинлар эркинлигини кафолатлайдиган тузатишни рўкач қилиб кўрсатган.
Судья Таня Чуткан ўз қарорида собиқ президентлар бошқа фуқаролар сингари жиноий жавобгарликка тортилиши мумкинлигини айтди. Судья конституция собиқ президентлар ҳукуматда бўлган вақтида содир этган жиноятлари учун мутлақ дахлсизликни таъминлай олмайди, деган хулосага келди.
Лавозимдаги президент қандай иммунитетларга эга бўлишидан қатъи назар, Қўшма Штатларда биттагина ижрочи ҳокимият мавжуд, президентлик “умрбод қамоқдан озод этилиш” картаси бўла олмайди, — деди судья ўз қарорида.
Трампнинг адвокати Тодд Бланш суд қарорига изоҳ беришдан бош тортди.
АҚШ Адлия вазирлигининг махсус прокурори Жек Смит Трампни 2020 йилги АҚШ президентлик сайловларида овозларни санаб чиқишга халақит бериш, шунингдек, Конгресснинг Жо Байденнинг сайловда ғалаба қозонганини тасдиқлашига тўсқинлик қилишга уринишда айблади. Трамп айбини тан олишдан бош тортди ва прокурорларни унинг қайта сайланиш кампаниясига зарар етказишга уринишда айблади.
Трампга қарши айблов қўйилган энг оғир жиноятлар учун максимал жазо 20 йиллик қамоқдир. Суд жараёни 2024 йилнинг мартида бошланиши режалаштирилган, бироқ Трампнинг эҳтимолий мурожаатлари туфайли у қолдирилиши мумкин, деб ёзди Reuters.
Дональд Трамп федерал айбловларга дуч келган биринчи АҚШ президентига айланди. Шу билан бирга, у 2024 йилги сайловларда Республикачилар партиясидан президентликка номзод бўлиш учун курашда фаворит саналади. У айбдор деб топилиб, қамоққа юборилган тақдирда ҳам АҚШ президентлигига номзодини қўйиши мумкин.
Изоҳ (0)