Осиё тараққиёт банки (ОТБ) Ўзбекистонда кичик ва ўрта корхоналарни қўллаб-қувватлаш ва иқтисодий ўсишни рағбатлантириш учун 100 миллион доллар миқдорида сиёсат чораларига асосланган қарз ажратилишини маъқуллади. Бу ҳақда банк матбуот хизмати хабар берди.
ОТБнинг Кичик ва ўрта корхоналарни ривожлантириш дастури хусусий секторни ривожлантиришга асосланган иқтисодий ўсишни рағбатлантириш ва кичик ҳамда ўрта корхоналарнинг COVID-19 пандемияси натижасида бўлган каби иқтисодий зарбаларга чидамлилигини ошириш учун уларнинг фаолият муҳитини яхшилашга ёрдам беради. Бу дастур доирасидаги иккинчи кичик дастур бўлиб, биринчи кичик дастур доирасида Ҳукумат томонидан амалга оширилган сиёсат, тартибга солиш ва институционал ислоҳотларга асосланади.
“Дастур ОТБнинг Ўзбекистондаги кичик ва ўрта корхоналарни қўллаб-қувватлаш бўйича тизимли навбатдаги қадамидир. Мамлакат давлат иқтисодиётидан оқилона умумий макроиқтисодий ёндашувга асосланган бозор иқтисодиётига ўтиш бўйича асосий таркибий ислоҳотларни амалга оширишни давом этар экан, кичик ва ўрта корхоналар диверсификацияланган иқтисодий ўсишни, самарадорликни ва қўшимча қийматга эга расмий бандликни жадаллаштиришда муҳим рол ўйнайди”, — дейди ОТБнинг Марказий ва Ғарбий Осиё бўйича бош директори Евгений Жуков.
Таъкидланишича, ОТБ дастури Ўзбекистон ҳукуматини юқори фоиз ставкалари ва юқори гаров талабларига эга банклар ҳукмронлик қиладиган молия секторида кичик ва ўрта корхоналар ўз ривожланишининг турли босқичлари учун зарур бўлган турли молия шаклларидан фойдаланишда улар дуч келадиган муаммоларни ҳар томонлама ҳал этишда қўллаб-қувватлайди.
Дастур бизнес юритиш харажатларини оширадиган ва аёллар бизнесига номутаносиб таъсир кўрсатадиган тартибга солиш ва маъмурий юкларни енгиллаштиришга ёрдам беради. Бу экспорт маҳсулотлари ва бозорларни диверсификация қилиш, шунингдек, рақамлаштириш орқали самарадорликни ошириш орқали кичик ва ўрта корхоналарнинг савдо рақобатбардошлигини оширишга хизмат қилади. Шунингдек, бозор талабларига жавоб берадиган кўникмаларни, айниқса, аёллар ва ёшларнинг бундай кўникмаларини иш билан таъминланиши имконияларини ошириш учун ривожлантиришга кўмаклашади.
Ўзбекистон ОТБга 1995 йилда аъзо бўлган. Ўшандан бери банк мамлакатга 10,8 миллиард доллар миқдорида қарз, грант ва техник кўмак тақдим этган. ОТБ ўта қашшоқликка барҳам бериш бўйича саъй-ҳаракатларини давом эттириб, ривожланган, кенг қамровли ва барқарор Осиё ва Тинч океани минтақасига эришишга интилади. ОТБ 1966 йилда ташкил этилган бўлиб, унга 68 мамлакат аъзо бўлган. Уларнинг 49 таси минтақада жойлашган.
Сентябрь охирларида Осиё тараққиёт банки (ОТБ) Ўзбекистоннинг 2023 ва 2024 йил учун иқтисодий ўсиши прогнозини яхшилаганди. Ундан олдинроқ эса ОТБ Ўзбекистон энергия тақсимлаш тизимини рақамлаштиришга 200 млн доллар қарз ажратиши маълум бўлган эди.
Изоҳ (0)