Osiyo taraqqiyot banki (OTB) O‘zbekistonning 2023 va 2024-yil uchun iqtisodiy o‘sishi prognozini yaxshiladi. Bu haqda bankning sentyabr oyidagi sharhida ma’lum qilindi.
Hisobotda qayd etilishicha, O‘zbekiston iqtisodiyoti yaqin ikki yilda har yili 5,5 foizga o‘sadi. Aprel oyida bank 5 foizlik iqtisodiy o‘sishni prognoz qilgandi. Prognozni yaxshilashning sabablari orasida Rossiyaga oziq-ovqat va to‘qimachilik mahsulotlari eksportining ko‘payishi hamda investitsiyalarning o‘sishi ko‘rsatilgan.
O‘zbekiston iqtisodiyoti birinchi yarim yillikda 5,6 foizga o‘sgan va bu kutilganidan yuqori. Bu fiskal rag‘batlantirish, mustahkam tashqi savdo, sanoatning o‘sishi hamda tog‘-kon sanoati va investitsiyalarning ko‘payishi bilan qo‘llab-quvvatlangan. Biroq inflatsiya tufayli iste’mol sekinlashgan.
Shuningdek, OTB inflatsiyaning 10 foizdan pastga tushishini kutmayapti. Hisobotda keltirilishicha, narxlarni liberallashtirish qisqa muddatda inflatsiya bosimining oshishiga yordam beradi.
Bundan tashqari, 2023-yilning birinchi choragida pul o‘tkazmalari hajmi 2022 yildagi eng yuqori ko‘rsatkichga nisbatan 55 foizga kamaygan. Buning sabablaridan biri — Rossiyada ishlayotgan mavsumiy mehnat muhojirlari sonining qisqarishi.
Sentabr boshlarida Iqtisodiy tadqiqotlar va islohotlar markazi tomonidan O‘zbekistonning makroiqtisodiy ko‘rsatkichlari tahlil etilgan choraklik hisoboti chop etilgandi. Markaz prognozlariga ko‘ra, 2023-yilda O‘zbekiston yalpi ichki mahsulotining o‘sishi bazaviy ssenariy bo‘yicha 5,8 foizni tashkil etishi kutilmoqda.
Izoh (0)